ବିଦ୍ୟାଳୟଗୁଡ଼ିକରେ ପଢ଼ୁଥିବା କୁନି କୁନି ଛାତ୍ରଛାତ୍ରୀଙ୍କ ମାନସିକ ଚାପ ହ୍ରାସ କରିବା ଏବଂ ସେମାନଙ୍କ ସାମଗ୍ରିକ କଲ୍ୟାଣ ପାଇଁ କେନ୍ଦ୍ର ସରକାର ଏକ ବଡ଼ ନୀତି ଆଣିବାକୁ ଯାଉଛନ୍ତି। ବିଦ୍ୟାଳୟଗୁଡ଼ିକ ପାଇଁ ପ୍ରସ୍ତାବିତ ‘ଜାତୀୟ ମାନସିକ ସ୍ୱାସ୍ଥ୍ୟ ଓ କଲ୍ୟାଣ ନୀତି’ର ଡ୍ରାଫ୍ଟ ଉପରେ ଆୟୋଜିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକରେ ଅଧ୍ୟକ୍ଷତା କରିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଶିକ୍ଷା ମନ୍ତ୍ରଣାଳୟ ପକ୍ଷରୁ ଶୁକ୍ରବାର ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ (X) ରେ ଏହି ସୂଚନା ଦିଆଯାଇଛି। କେନ୍ଦ୍ରମନ୍ତ୍ରୀ ବିଭାଗୀୟ ଅଧିକାରୀ, କମିଟି ସଦସ୍ୟ ଏବଂ ଡୋମେନ୍ ବିଶେଷଜ୍ଞମାନଙ୍କ ସହ ଏହି ପ୍ରସ୍ତାବିତ ନୀତି ଉପରେ ବିସ୍ତୃତ ଆଲୋଚନା କରିଛନ୍ତି।

ବୈଠକରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଶିକ୍ଷା ପରିବେଶରେ ମାନସିକ ସୁସ୍ଥତାକୁ ପ୍ରୋତ୍ସାହିତ କରିବା ପାଇଁ ଏକ ସାମଗ୍ରିକ ଓ ପ୍ରତିଷେଧକ ଆଭିମୁଖ୍ୟ ଉପରେ ବିଶେଷ ଗୁରୁତ୍ୱାରୋପ କରିଛନ୍ତି। ସେ କହିଛନ୍ତି ଯେ, ବିଦ୍ୟାଳୟଗୁଡ଼ିକରେ ଏକ ସକାରାତ୍ମକ ସଂସ୍କୃତି ଗଠନ ହେବା ଆବଶ୍ୟକ, ଯାହା ପିଲାମାନଙ୍କ ପାଇଁ ନିରାପଦ, ଅନ୍ତର୍ଭୁକ୍ତ ଓ ସହାୟକ ଶିକ୍ଷଣ ପରିବେଶ ପ୍ରଦାନ କରିବ। ଏହି ମାନସିକ ସ୍ୱାସ୍ଥ୍ୟ ନୀତିରେ ‘ଭାରତୀୟ ଜ୍ଞାନ ପ୍ରଣାଳୀ ଏବଂ ସଂସ୍କୃତି’ର ସହାୟତା ନିଆଯିବା ଉଚିତ ବୋଲି ସେ ମତ ଦେଇଛନ୍ତି।

ଏହି ନୂତନ ନୀତି ଅଧୀନରେ ଶିକ୍ଷକମାନଙ୍କ ଭୂମିକା ଅତି ଗୁରୁତ୍ୱପୂର୍ଣ୍ଣ ହେବ। ବିଦ୍ୟାଳୟରେ ଛାତ୍ରଛାତ୍ରୀମାନଙ୍କ ପାଇଁ ଶିକ୍ଷକମାନଙ୍କୁ ‘ପ୍ରଥମ ସ୍ତରର ପରାମର୍ଶଦାତା’ (First-level Mentors/Counselors) ଭାବେ ସ୍ଥାନିତ କରାଯିବ। ଯାହାଫଳରେ ଶିକ୍ଷକମାନେ ଛାତ୍ରମାନଙ୍କ ମଧ୍ୟରେ ଥିବା ଚାପ କିମ୍ବା ମାନସିକ ଅବସାଦର ପ୍ରାରମ୍ଭିକ ଚିହ୍ନଟ କରି ସେମାନଙ୍କୁ ଉଚିତ ମାର୍ଗଦର୍ଶନ ଦେଇପାରିବେ।

କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ କହିଛନ୍ତି ଯେ, ଏକ ଶିଶୁର ମାନସିକ ସ୍ୱାସ୍ଥ୍ୟ କେବଳ ବିଦ୍ୟାଳୟ ଦ୍ୱାରା ପ୍ରଭାବିତ ହୋଇନଥାଏ, ବରଂ ତା’ର ଘରର ପରିବେଶ ମଧ୍ୟ ଏଥିପାଇଁ ସମାନ ଭାବେ ଦାୟୀ। ତେଣୁ ସମସ୍ତେ (ଶିକ୍ଷକ ଓ ଅଭିଭାବକ) ଏକାଠି ହେବା ଏବଂ ନିୟମିତ ଭାବରେ ଶିଶୁର ଶିକ୍ଷା ତଥା ସାମଗ୍ରିକ ପ୍ରଗତିର ସମୀକ୍ଷା କରିବା ଜରୁରୀ।

ମନ୍ତ୍ରଣାଳୟର ସୂଚନା ମୁତାବକ, ଏହି ମାନସିକ ସ୍ୱାସ୍ଥ୍ୟ ନୀତି ଜୁନ୍ ପ୍ରଥମ ସପ୍ତାହରେ ରିଲିଜ୍ ହେବାର ସମ୍ଭାବନା ରହିଛି। ଏହି ନୀତି ବିଦ୍ୟାଳୟଗୁଡ଼ିକରେ କାଉନସେଲିଂ ଓ ମାନସିକ ସ୍ୱାସ୍ଥ୍ୟ ସହାୟତା ବ୍ୟବସ୍ଥାକୁ ସମ୍ପୂର୍ଣ୍ଣ ମଜବୁତ କରିବା ଉପରେ ଧ୍ୟାନ ଦେବ, ଯାହା ଆଗାମୀ ଦିନରେ ଦେଶର ଛାତ୍ର ସମାଜକୁ ଏକ ସୁସ୍ଥ ଓ ଭୟମୁକ୍ତ ଭବିଷ୍ୟତ ପ୍ରଦାନ କରିବ।