ଭି.କେ. ପାଣ୍ଡିଆନଙ୍କ ପତ୍ନୀ ତଥା ମିଶନ ଶକ୍ତିର ପୂର୍ବତନ ସଚିବ ସୁଜାତା କାର୍ତ୍ତିକେୟନ ଶଙ୍ଖ ଭବନରେ ବିଧିବଦ୍ଧ ଭାବେ ବିଜେଡିରେ ଯୋଗ ଦେଇଛନ୍ତି। ଦଳର ସୁପ୍ରିମୋ ନବୀନ ପଟ୍ଟନାୟକ ତାଙ୍କୁ ସ୍ୱାଗତ କରିବା ସହ ସେ ଜଣେ ସାଧାରଣ କର୍ମୀ ଭାବେ ମହିଳାମାନଙ୍କ ବିକାଶ ପାଇଁ କାମ କରିବେ ବୋଲି କହିଛନ୍ତି। ବିଜେଡିର ସବୁଠାରୁ ବଡ଼ ଶକ୍ତି ହେଉଛି ମହିଳା ଭୋଟର। ସୁଜାତା କାର୍ତ୍ତିକେୟନ ଦୀର୍ଘ ଦିନ ଧରି ଓଡ଼ିଶାର ‘ମିଶନ ଶକ୍ତି’ (Mission Shakti) ବିଭାଗର ମୁଖ୍ୟ ଭାବେ କାର୍ଯ୍ୟ କରିଛନ୍ତି। ରାଜ୍ୟର ଲକ୍ଷ ଲକ୍ଷ ମହିଳା ସ୍ୱୟଂ ସହାୟକ ଗୋଷ୍ଠୀ (SHG) ସହ ତାଙ୍କର ସିଧାସଳଖ ସମ୍ପର୍କ ରହିଛି। ସେ ଦଳକୁ ଆସିବା ଦ୍ୱାରା ମହିଳା ସଂଗଠନକୁ ନୂଆ ଶକ୍ତି ମିଳିପାରେ ଏବଂ ବିଜେଡିର ମହିଳା ଭୋଟ୍ ବ୍ୟାଙ୍କ ଆହୁରି ମଜବୁତ ହୋଇପାରେ । ତାଙ୍କ ଇମେଜକୁ ନେଇ ବିଜେଡି ଲୋକଙ୍କ ପାଖକୁ ଯାଇପାରେ । କିନ୍ତୁ ଭି.କେ. ପାଣ୍ଡିଆନଙ୍କୁ ନେଇ ଦଳର କର୍ମୀଙ୍କ ମଧ୍ୟରେ ଯେଉଁ ଅସନ୍ତୋଷ ଥିଲା, ସୁଜାତାଙ୍କ ଏଣ୍ଟ୍ରି ଦ୍ୱାରା ତାହା ପୁଣି ସକ୍ରିୟ ହୋଇପାରେ। ତେବେ ସୁଜାତା ଏହି ଆହ୍ୱାନକୁ କେମିତି ସାମ୍ନା କରି ଦଳକୁ ଫାଇଦା ପହଞ୍ଚାଉଛନ୍ତି, ତାହା ବଡ଼ ପ୍ରଶ୍ନ ।
ସୁଜାତା ଜଣେ ୨୦୦୦ ବ୍ୟାଚ୍ର ଦକ୍ଷ ଆଇଏଏସ୍ ଅଫିସର ଥିଲେ। ସୁନ୍ଦରଗଡ଼ ଓ କଟକର କଲେକ୍ଟର ଭାବେ ଏବଂ ମମତା ଯୋଜନା (Mamata Scheme) ଭଳି ପ୍ରମୁଖ ଜନକଲ୍ୟାଣକାରୀ ଯୋଜନାର ସଫଳ ରୂପାୟନରେ ତାଙ୍କର ବଡ଼ ଅବଦାନ ରହିଛି। ତାଙ୍କର ଏହି ଦୀର୍ଘ ୨୪ ବର୍ଷର ପ୍ରଶାସନିକ ଅନୁଭବ, ସାଂଗଠନିକ ଦକ୍ଷତା ଓ ନିଷ୍ପତ୍ତି ନେବାର ଶୈଳୀ ଦଳର ରଣନୀତି ପ୍ରସ୍ତୁତ କରିବାରେ ବେଶ୍ ସହାୟକ ହୋଇପାରେ।
୨୦୨୪ ନିର୍ବାଚନରେ ବିଜେପି (BJP) ଭି.କେ. ପାଣ୍ଡିଆନଙ୍କ ଅଣ-ଓଡ଼ିଆ ପରିଚୟକୁ ନେଇ ‘ଓଡ଼ିଆ ଅସ୍ମିତା’ର ନାରା ଦେଇଥିଲା, ଯାହା ବିଜେଡିକୁ ବ୍ୟାକଫୁଟ୍କୁ ନେଇଯାଇଥିଲା। କିନ୍ତୁ ସୁଜାତା କାର୍ତ୍ତିକେୟନ (ସୁଜାତା ରାଉତ) ନିଜେ କେନ୍ଦ୍ରାପଡ଼ାର ଝିଅ ଏବଂ ଜଣେ ଓଡ଼ିଆ। ତେଣୁ ତାଙ୍କ ଜରିଆରେ ବିଜେଡି ବିରୋଧୀଙ୍କ ‘ବାହାର ଲୋକ’ ଅଭିଯୋଗର ସହଜରେ ମୁକାବିଲା କରିପାରେ।
ନବୀନ ପଟ୍ଟନାୟକଙ୍କ ବୟସ ଅଧିକ ହେଉଥିବାରୁ ଦଳକୁ ସଫଳତାର ସହ ଚଲାଇବା ପାଇଁ ଜଣେ ବିଶ୍ୱସ୍ତ ଏବଂ ଦକ୍ଷ ସହଯୋଗୀଙ୍କ ଆବଶ୍ୟକତା ରହିଛି। ସୁଜାତା ଦଳ ଭିତରେ ରହି ପଛରେ ରହି ସଙ୍ଗଠନ ପରିଚାଳନା କରିପାରିବେ। ନବୀନ ବାବୁଙ୍କ ବିଶ୍ୱସ୍ତ ହୋଇଥିବାରୁ ସେ ଆଗାମୀ ଦିନରେ ଦଳର ଏକ ପ୍ରମୁଖ ଚେହେରା ଭାବେ ଉଭା ହୋଇପାରନ୍ତି। ଦଳରେ ନେତୃତ୍ବ କନ୍ଦଳ, ଗୋଷ୍ଠୀ କନ୍ଦଳ ବଢ଼ି ବଢ଼ି ଚାଲିଥିବା ବେଳେ ସୁଜାତାଙ୍କ ଏଣ୍ଟ୍ରି ଦଳରେ କି ପ୍ରଭାବ ପକାଉଛି ତାହା ସମୟ କହିବ ।
