ଚୀନ ରାଷ୍ଟ୍ରପତି ସି ଜିନ୍ପିଙ୍ଗ ସାତ ବର୍ଷରେ ପ୍ରଥମ ଥର ପାଇଁ ଭାରତ ଗସ୍ତରେ ଆସିବେ । ରୟଟର୍ସ ରିପୋର୍ଟ ଅନୁସାରେ, ଚୀନ ରାଷ୍ଟ୍ରପତି ସି ଜିନ୍ପିଙ୍ଗ ଆସନ୍ତା ମାସରେ ନୂଆଦିଲ୍ଲୀରେ ହେବାକୁ ଥିବା ବ୍ରିକ୍ସ ଶିଖର ସମ୍ମିଳନୀରେ ଏକ ବଡ଼ ପ୍ରତିନିଧିମଣ୍ଡଳ ସହ ଯୋଗଦେବେ । ଏହା ସାତ ବର୍ଷ ପରେ ତାଙ୍କ ପ୍ରଥମ ଭାରତ ଗସ୍ତ ହେବ ଏବଂ ଦୁଇ ପ୍ରତିଦ୍ୱନ୍ଦ୍ୱୀ ଦେଶ ମଧ୍ୟରେ ସଂପର୍କ ସୁଧାରିବାର ଏକ ନୂଆ ସଂକେତ ହେବ । ଭାରତ ସେପ୍ଟେମ୍ୱର ୧୨ରୁ ୧୩ ଦୁଇ ଦିନ ଯାଏ ବ୍ରିକ୍ସ ଶିଖର ସମ୍ମିଳନୀର ଆୟୋଜନ କରିବାକୁ ଯାଉଛି, ଏଥିରେ ଜିନପିଙ୍ଗଙ୍କ ଯୋଗଦାନ ନେଇ ଅନୁମାନ କରାଯାଉଛି ।
ରିପୋର୍ଟରେ କୁହାଯାଇଛି ଯେ ଏହି ଗସ୍ତ ସମୟରେ ଜିନ୍ପିଙ୍ଗଙ୍କ ବ୍ରିକ୍ସ ଶିଖର ସମ୍ମିଳନୀରେ ଉପସ୍ଥିତି ଠାରୁ ଦୁଇ ଦେଶର ସଂପର୍କ ସୁଧାରିବା ଦିଗରେ ତାଙ୍କ ଆଭିମୁଖ୍ୟ କଣ ରହୁଛି, ତାହା ଉପରେ ରହିବ । ରିପୋର୍ଟ ଅନୁସାରେ, ଚୀନ ଅଧିକାରୀ ହୋଟେଲ୍ ଏବଂ ସୁରକ୍ଷା ପ୍ରୋଟୋକଲକୁ ଚୂଡ଼ାନ୍ତ ରୂପ ଦେବାରେ ଲାଗିପଡ଼ିଛନ୍ତି । ତେବେ ଏନେଇ ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ କୌଣସି ବୟାନ ଦିଆଯାଇନାହିଁ ।
ଉଲ୍ଲେଖଯୋଗ୍ୟ ଯେ ଏହା ପୂର୍ବରୁ ୨୦୧୯ ଅକ୍ଟୋବରରେ ଜିନପିଙ୍ଗ ନୂଆଦିଲ୍ଲୀ ଗସ୍ତରେ ଆସିଥିଲେ । ଗତ ବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଡୋକଲାମ ସଂଘର୍ଷ ପରେ ପ୍ରଥମ ଥର ଚୀନ ଗସ୍ତ କରିଥିଲେ । ଏହାପରେ ଦୁଇ ଦେଶ ମଧ୍ୟରେ ସ୍ଥିତିରେ ସାମାନ୍ୟ ସୁଧାର ଦେଖିବାକୁ ମିଳିଥିଲା । ତେବେ ନିକଟରେ ସୀମା ସହ ଜଡ଼ିତ ନୂଆ ବିବାଦ କାରଣ ଉଭୟ ପକ୍ଷ ମଧ୍ୟରେ ପୁଣି ଥରେ କୂଟନୈତିକ ବୟାନବାଜି ଆରମ୍ଭ ହୋଇଛି । ସେପଟେ ଏହି ଗସ୍ତକୁ ନେଇ ଦାବି କରାଯାଉଛି ଯେ ଜିନପିଙ୍ଗ ନିଜ ସହ ୪୦୦ ଅଧିକାରୀଙ୍କ ପ୍ରତିନିଧିମଣ୍ଡଳ ଭାରତ ଆସିବାର ସମ୍ଭାବନା ରହିଛି । ତାଙ୍କ ଶେଷ ଗସ୍ତ ସମୟରେ ୨୦୦ରୁ କମ ଅଧିକାରୀ ସାମିଲ ଥିଲେ ।
