ପୁରୀ: ପବିତ୍ର କାର୍ତ୍ତିକ ମାସର ଶେଷ ପାଞ୍ଚ ଦିନିଆ ପର୍ବ ମହାକାର୍ତ୍ତିକ ପଞ୍ଚୁକ ଆରମ୍ଭ ହୋଇଯାଇଛି। ଶାସ୍ତ୍ର କହେ, ସାରା ମାସ ବ୍ରତ କରି ଯେତିକି ପୁଣ୍ୟ ମିଳେ, ଏହି ୫ ଦିନ ବ୍ରତ ରଖିଲେ ତା’ଠୁ ଅଧିକ ପୁଣ୍ୟ ମିଳେ। ଏହି ପର୍ବକୁ ‘ବକ ପଞ୍ଚମୀ’ କିମ୍ବା ‘ଭୀଷ୍ମ ପଞ୍ଚକ’ ମଧ୍ୟ କୁହାଯାଏ।
ଏଥର କାର୍ତ୍ତିକ ଶୁକ୍ଳ ଦ୍ୱାଦଶୀ କ୍ଷୟ ହେଉଥିବାରୁ ପଞ୍ଚୁକ କେବଳ ଚାରି ଦିନ ପଡ଼ିବ। ଏହି ଚାରି ଦିନରେ ମହାପ୍ରଭୁଙ୍କ ବିଭିନ୍ନ ବିଶେଷ ବେଶ ଦର୍ଶନ କଲେ ସମସ୍ତ ପାପ କଟିଯାଏ ବୋଲି ଭକ୍ତମାନେ ବିଶ୍ୱାସ କରନ୍ତି।
ଆଜି ଲକ୍ଷ୍ମୀ ନାରାୟଣ ବେଶ । ସୋମବାର-ଡାଳିକିଆ ବା ତ୍ରିବିକ୍ରମ ବେଶ । ମଙ୍ଗଳବାର -ଲକ୍ଷ୍ମୀ ନୃସିଂହ ବେଶ । ପୂର୍ଣ୍ଣିମା (ବୁଧବାର)-ରାଜାଧିରାଜ ଓ ସୁନାବେଶ ।
ଏତେ ବଡ଼ ପର୍ବ ପାଇଁ ଭକ୍ତଙ୍କ ଭିଡ଼କୁ ଦୃଷ୍ଟିରେ ରଖି ଶ୍ରୀମନ୍ଦିର ପ୍ରଶାସନ କିଛି ଗୁରୁତ୍ୱପୂର୍ଣ୍ଣ ନିୟମ ଲାଗୁ କରିଛନ୍ତି । ଭିଡ଼ ଯୋଗୁଁ ଆଜିଠାରୁ ମଙ୍ଗଳବାର ପର୍ଯ୍ୟନ୍ତ (ପ୍ରଥମ ତିନି ଦିନ) ଭକ୍ତମାନେ କେବଳ ବାହାରକାଠ ନିକଟରୁ ମହାପ୍ରଭୁଙ୍କୁ ଦର୍ଶନ କରିବେ। କେବଳ କାର୍ତ୍ତିକ ପୂର୍ଣ୍ଣିମା ଦିନ ପ୍ରଥମ ଭୋଗ ମଣ୍ଡପ ପରେ ଭକ୍ତମାନେ ଭିତରକାଠ ନିକଟରୁ ଦର୍ଶନ ପାଇବେ। ମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ ସୂଚନା ଦେଇଛନ୍ତି ଯେ ଭିଡ଼କୁ ନିୟନ୍ତ୍ରଣ କରିବା ପାଇଁ ଯାତ୍ରୀ ପଣ୍ଡାମାନେ କୌଣସି ଯାତ୍ରୀଙ୍କୁ ମନ୍ଦିର ଭିତରକୁ ନେଇ ଯାଇପାରିବେ ନାହିଁ। ଭକ୍ତମାନେ ସିଂହଦ୍ୱାରରେ ଭିତରକୁ ଯିବେ ଏବଂ ଅନ୍ୟ ତିନି ଦ୍ୱାର ଦେଇ ବାହାରକୁ ଆସିବେ।
ଶ୍ରୀମନ୍ଦିର ଭିତରେ ଓ ବାହାରେ ଭକ୍ତଙ୍କ ସୁରକ୍ଷା ପାଇଁ ସ୍ୱାସ୍ଥ୍ୟ ଓ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ମନ୍ଦିର ଭିତର ବେଢ଼ାରେ ଏବଂ ବାଗେଡ଼ିଆ ଧର୍ମଶାଳା ନିକଟରେ ୨୪ ଘଣ୍ଟିଆ ସ୍ୱାସ୍ଥ୍ୟକେନ୍ଦ୍ର ଖୋଲାଯାଇଛି। ଏହି ସମୟରେ ଭକ୍ତମାନଙ୍କୁ ଶାନ୍ତିଶୃଙ୍ଖଳା ରକ୍ଷା କରିବାକୁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି।
