ପାନାଜୀ: ଭଗବାନ ରାମଙ୍କର ୭୭ ଫୁଟ୍ ଉଚ୍ଚତା ମୂର୍ତ୍ତି ଗୋଆରେ ସ୍ଥାପନ କରାଯାଇଛି । ଦେଶର ସାଂସ୍କୃତିକ ଓ ଆଧ୍ୟାତ୍ମିକ ଐତିହ୍ୟକୁ ପ୍ରୋତ୍ସାହିତ କରିବା ଦିଗରେ ଏକ ବୃହତ ପଦକ୍ଷେପ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦକ୍ଷିଣ ଗୋଆର ଶ୍ରୀସଂସ୍ଥାନ ଗୋକର୍ଣ୍ଣ ଜୀବୋତ୍ତମ ମଠରେ ଭଗବାନ ରାମଙ୍କର ୭୭ ଫୁଟ୍ ଉଚ୍ଚତା ବିଶିଷ୍ଟ ବ୍ରୋଞ୍ଜ ମୂର୍ତ୍ତିକୁ ଅନାବରଣ କରିଛନ୍ତି। ଏହା ହେଉଛି ଭଗବାନ ରାମଙ୍କର ଏପର୍ଯ୍ୟନ୍ତ ନିର୍ମିତ ସର୍ବୋଚ୍ଚ ମୂର୍ତ୍ତି।
ଏହି ମୂର୍ତ୍ତିର ଡିଜାଇନ୍ ପ୍ରସିଦ୍ଧ ଶିଳ୍ପୀ ରାମ ସୁତାର କରିଛନ୍ତି, ଯିଏକି ଗୁଜରାଟର ବିଶ୍ୱବିଖ୍ୟାତ ‘ଷ୍ଟାଚ୍ୟୁ ଅଫ୍ ୟୁନିଟି’ର ଶିଳ୍ପୀ ଭାବରେ ମଧ୍ୟ ଜଣାଶୁଣା। ମୂର୍ତ୍ତିର ବିଶାଳତା ଏବଂ କଳାତ୍ମକତା ଏହାକୁ ଏକ ପ୍ରମୁଖ ଆକର୍ଷଣର କେନ୍ଦ୍ର କରିବ।
ଅନାବରଣ ପରେ ପ୍ରଧାନମନ୍ତ୍ରୀ ମୋଦି ମଠ ପରିସରରେ ଥିବା ମନ୍ଦିରକୁ ପରିଦର୍ଶନ କରି ପୂଜାର୍ଚ୍ଚନା କରିଥିଲେ। ଶ୍ରୀ ସଂସ୍ଥାନ ଗୋକର୍ଣ୍ଣ ଜୀବୋତ୍ତମ ମଠ ଭାରତର ଅନ୍ୟତମ ପୁରାତନ ଆଧ୍ୟାତ୍ମିକ କେନ୍ଦ୍ର ଭାବରେ ପରିଚିତ ଏବଂ ଏହାର ସାରସ୍ୱତ ସମ୍ପ୍ରଦାୟ ମଧ୍ୟରେ ଏକ ବିଶେଷ ସ୍ଥାନ ରହିଛି।
ବୁଦ୍ଧିଜୀବୀମାନେ ମତ ଦେଇଛନ୍ତି ଯେ ଏହି ମୂର୍ତ୍ତିର ସ୍ଥାପନା ଗୋଆକୁ ଆଧ୍ୟାତ୍ମିକ ପର୍ଯ୍ୟଟନ ମାନଚିତ୍ରରେ ଏକ ନୂତନ ପରିଚୟ ଦେବ ଏବଂ ଭାରତର ସାଂସ୍କୃତିକ ସମୃଦ୍ଧିକୁ ପ୍ରତିଫଳିତ କରିବ। ମୋଦିଙ୍କ ଏହି ପଦକ୍ଷେପ ଦେଶର ଧାର୍ମିକ ଓ ସାଂସ୍କୃତିକ ଭାବନାକୁ ଶକ୍ତିଶାଳୀ କରିବାରେ ସହାୟକ ହେବ।
