ରାଜ୍ୟରେ କାଳବୈଶାଖୀ ଜନିତ ପ୍ରବଳ ଝଡ଼ତୋଫାନ ଓ ବର୍ଷା ଯୋଗୁଁ ଏକ ବଡ଼ ଧରଣର ଅଘଟଣରୁ ଅଳ୍ପକେ ବର୍ତ୍ତିଯାଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ମୁଖ୍ୟମନ୍ତ୍ରୀଙ୍କ ଗସ୍ତ ସମୟରେ ହଠାତ୍ ପାଗ ଖରାପ ହେବା ଏବଂ କାଳବୈଶାଖୀର ପ୍ରକୋପ ଯୋଗୁଁ ତାଙ୍କ ହେଲିକପ୍ଟରକୁ ଜରୁରୀ ଅବତରଣ (Emergency Landing) କରାଯାଇଥିଲା । ଅନ୍ୟପଟେ, ଏହି ପ୍ରଳୟଙ୍କରୀ କାଳବୈଶାଖୀ ଝଡ଼ ଯୋଗୁଁ ସାରା ରାଜ୍ୟରେ ବ୍ୟାପକ କ୍ଷୟକ୍ଷତି ଘଟିବା ସହ ସାଧାରଣ ଲୋକେ ହନ୍ତସନ୍ତ ହୋଇପଡ଼ିଛନ୍ତି।
ସୂଚନା ଅନୁଯାୟୀ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏକ ନିର୍ଦ୍ଦିଷ୍ଟ କାର୍ଯ୍ୟକ୍ରମରେ ଯୋଗଦେବା ପାଇଁ ହେଲିକପ୍ଟର ଯୋଗେ ଗସ୍ତ କରୁଥିଲେ। ହେଲେ ଆକାଶ ମାର୍ଗରେ ଗତି କରୁଥିବା ସମୟରେ ହଠାତ୍ କାଳବୈଶାଖୀ ମାଡ଼ି ଆସିଥିଲା। ପ୍ରବଳ ପବନ ସାଙ୍ଗକୁ ମେଘ ଗର୍ଜନ ଏବଂ କମ୍ ଦୃଶ୍ୟମାନତା (Low Visibility) ଯୋଗୁଁ ହେଲିକପ୍ଟର ଆଗକୁ ବଢ଼ିବା ଅସମ୍ଭବ ହୋଇପଡ଼ିଥିଲା। ପାଇଲଟ୍ ନିଜର ଚତୁରତା ଓ ସତର୍କତା ଆପଣେଇ ତୁରନ୍ତ ଏକ ନିରାପଦ ସ୍ଥାନରେ ମୁଖ୍ୟମନ୍ତ୍ରୀଙ୍କ ହେଲିକପ୍ଟରର ଜରୁରୀ ଅବତରଣ କରାଇଥିଲେ। ସୌଭାଗ୍ୟବଶତଃ, ମୁଖ୍ୟମନ୍ତ୍ରୀ ଏବଂ ହେଲିକପ୍ଟରରେ ଥିବା ସମସ୍ତ ସଦସ୍ୟ ସମ୍ପୂର୍ଣ୍ଣ ସୁରକ୍ଷିତ ଥିବା ଜଣାପଡ଼ିଛି।
ପ୍ରବଳ ବେଗରେ ବୋହିଥିବା ପବନ ଯୋଗୁଁ ଟ୍ୱିନ୍ ସିଟି ଭୁବନେଶ୍ୱର-କଟକ ସମେତ ରାଜ୍ୟର ଅନେକ ସ୍ଥାନରେ ଶହ ଶହ ବଡ଼ ବଡ଼ ଗଛ ଉପୁଡ଼ି ରାସ୍ତା ଉପରେ ପଡ଼ିଛି। ବିଦ୍ୟୁତ୍ ଖୁଣ୍ଟ ଏବଂ ଟ୍ରାନ୍ସଫର୍ମର ଉପରେ ଗଛ ପଡ଼ିବା ଯୋଗୁଁ ଅନେକ ଅଞ୍ଚଳରେ ଘଣ୍ଟା ଘଣ୍ଟା ଧରି ବିଦ୍ୟୁତ୍ ସେବା ସମ୍ପୂର୍ଣ୍ଣ ବ୍ୟାହତ ହୋଇଛି।
ରାସ୍ତା ଉପରେ ଗଛ ଏବଂ ବେଆଇନ ବ୍ୟାନର/ହୋର୍ଡିଂ ଭାଙ୍ଗି ପଡ଼ିବାରୁ ମୁଖ୍ୟ ମାର୍ଗଗୁଡ଼ିକରେ କିଲୋମିଟର ଲମ୍ବର ଟ୍ରାଫିକ ଜାମ୍ ଦେଖିବାକୁ ମିଳିଛି। ଅଫିସ୍ ସେଫ୍ଟ ସରିବା ସମୟରେ ଏହି ଝଡ଼ ହୋଇଥିବାରୁ ବାଇକ୍ ଆରୋହୀ ଏବଂ ସାଧାରଣ ପଥଚାରୀମାନେ ବର୍ଷା ଓ ପବନରେ ଆଶ୍ରୟ ନପାଇ ନାହିଁ ନଥିବା ଦୁର୍ଦ୍ଦଶାର ସାମ୍ନା କରିଛନ୍ତି । ପବନ ସାଙ୍ଗକୁ କେତେକ ସ୍ଥାନରେ ପ୍ରବଳ ମାତ୍ରାରେ ବର୍ଷା ଯୋଗୁଁ କ୍ଷେତରେ ଥିବା ଫସଲ ଏବଂ ପନିପରିବା ଚାଷ ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଏଭଳି ସମୟରେ ମୁଖ୍ୟମନ୍ତ୍ରୀଙ୍କ ହେଲିକପ୍ଟର ଜରୁରୀ ଅବତରଣ ଘଟଣା ପରେ ପ୍ରଶାସନ ତୁରନ୍ତ ଆକ୍ସନ ମୋଡ୍କୁ ଆସିଥିଲା। ମିଳିଥିବା ସୂଚନା ଅନୁସାରେ, ମୟୂରଭଞ୍ଜ ଗସ୍ତ ସାରି ହେଲିକପ୍ଟର ଯୋଗେ ଭୁବନେଶ୍ବର ଫେରୁଥିଲେ ମୁଖ୍ୟମନ୍ତ୍ରୀ। କିନ୍ତୁ କାଳବୈଶାଖୀ ଯୋଗୁ ମୁଖ୍ୟମନ୍ତ୍ରୀଙ୍କ ହେଲିକପ୍ଟର ଭୁବନେଶ୍ବର ବିମାନବନ୍ଦରରେ ଲ୍ୟାଣ୍ଡ୍ କରିପାରିନଥିଲା। ଫଳରେ ପୁରୀରେ ଜରୁରୀ ଅବତରଣ କରିବାକୁ ପଡ଼ିଥିଲା।
