କେନ୍ଦ୍ର କ୍ୟାବିନେଟ ଜୁନ୍ ୧୦, ୨୦୨୬କୁ ଭାରତୀୟ ଗଣତନ୍ତ୍ରର ଯାତ୍ରାରେ ଏକ ଐତିହାସିକ ମାଇଲଖୁଣ୍ଟ ଭାବରେ ଗ୍ରହଣ କରି ଏକ ପ୍ରସ୍ତାବ ଗ୍ରହଣ କରିଛି, ଯେଉଁଥିରେ ଶ୍ରୀ ନରେନ୍ଦ୍ର ମୋଦୀଙ୍କୁ ଦେଶର ସବୁଠାରୁ ଦୀର୍ଘକାଳୀନ ନିର୍ବାଚିତ ପ୍ରଧାନମନ୍ତ୍ରୀ ହେବା ପାଇଁ ଅଭିନନ୍ଦନ ଜଣାଯାଇଛି। ନିର୍ବାଚିତ ପ୍ରଧାନମନ୍ତ୍ରୀ ଭାବରେ ଲଗାତର ୪,୩୯୯ ଦିନ ସେବା କରିବାର ରେକର୍ଡ ସ୍ଥାପନ କରି, ସେ ଶ୍ରୀ ଜବାହରଲାଲ ନେହେରୁଙ୍କ ପୂର୍ବ ରେକର୍ଡକୁ ଅତିକ୍ରମ କରିଛନ୍ତି, ଯିଏ ୧୯୫୨ ରୁ ୧୯୬୪ ପର୍ଯ୍ୟନ୍ତ ଲଗାତାର ୪,୩୯୮ ଦିନ ପ୍ରଧାନମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ । ପ୍ରସ୍ତାବରେ କୁହାଯାଇଛି ଯେ ଏହି ଅବସର ଭାରତର ଗଣତାନ୍ତ୍ରିକ ଚେତନା, ଜନ ବିଶ୍ୱାସ ଏବଂ ଜନ ଅଂଶଗ୍ରହଣର ଶକ୍ତିର ପ୍ରତୀକ ଭାବରେ ଠିଆ ହୋଇଛି, ଯାହା ‘ରାଷ୍ଟ୍ର ପ୍ରଥମ’ ସଂକଳ୍ପ ଦ୍ୱାରା ପରିଚାଳିତ ଜଣେ ନେତାଙ୍କ ପ୍ରତି ଲୋକଙ୍କ ଦ୍ୱାରା ପ୍ରଦତ୍ତ ଅଭୂତପୂର୍ବ ସମର୍ଥନକୁ ପ୍ରତିଫଳିତ କରେ।
ପ୍ରଧାନମନ୍ତ୍ରୀଙ୍କୁ ହାର୍ଦ୍ଦିକ ଅଭିନନ୍ଦନ ଏବଂ ଶୁଭେଚ୍ଛା ଜଣାଇ, ଏହି ପ୍ରସ୍ତାବରେ ଉଲ୍ଲେଖ କରାଯାଇଛି ଯେ ଏହି ମାଇଲଖୁଣ୍ଟ ଏପରି ସମୟରେ ଆସିଛି ଯେତେବେଳେ ତାଙ୍କ ନେତୃତ୍ବରେ ଏନଡିଏ ସରକାର ୧୨ ବର୍ଷ ପୂରଣ କରିଛି। ଏଥିରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ ସରକାର ମୁଖ୍ୟ ଭାବରେ ପ୍ରଧାନମନ୍ତ୍ରୀ ୨୫ ବର୍ଷର ଲଗାତାର ସେବାର ଐତିହାସିକ ସଫଳତା ହାସଲ କରିଛନ୍ତି। ସମ୍ବେଦନଶୀଳତା, ସଂଯମତା, ଦୃଢ଼ ନିଷ୍ପତ୍ତି ଏବଂ ନିର୍ଣ୍ଣାୟକତା ଦ୍ୱାରା ପରିପୂର୍ଣ୍ଣ ନେତୃତ୍ୱ ପ୍ରତି ଗର୍ବ ପ୍ରକାଶ କରି ଔପଚାରିକ ପ୍ରସ୍ତାବରେ କୁହାଯାଇଛି ଯେ ଛଅ ଦଶନ୍ଧି ପରେ, ଦେଶ କ୍ରମାଗତ ତୃତୀୟ ଥର ପାଇଁ ଏନଡିଏ ସରକାରଙ୍କୁ ଜନାଦେଶ ଦେଇଛି।
ପ୍ରଧାନମନ୍ତ୍ରୀଙ୍କ ଜୀବନକୁ ସେବା ଏବଂ ରାଷ୍ଟ୍ର ନିର୍ମାଣ ପ୍ରତି ନିରନ୍ତର ସମର୍ପଣର ପ୍ରତୀକ ଭାବରେ ରେଖାଙ୍କିତ କରି, ଏହି ପ୍ରସ୍ତାବରେ ସେ ୨୦୧୪ ରେ “ପ୍ରଧାନ ସେବକ” ଭାବରେ କରିଥିବା ଘୋଷଣାକୁ ମନେ ପକାଇ ଦିଆଯାଇଛି ଯାହା ‘ସବକା ସାଥ, ସବକା ବିକାଶ’ ମନ୍ତ୍ର ପ୍ରତି ପ୍ରତିବଦ୍ଧ ଥିଲା। ଗରିବଙ୍କ କଲ୍ୟାଣକୁ ଶାସନର କେନ୍ଦ୍ରରେ ରଖାଯାଇଛି ବୋଲି ଉଲ୍ଲେଖ କରି, ଏଥିରେ ବ୍ୟାପକ ସ୍ତରରେ ଯୋଗାଇ ଦିଆଯାଇଥିବା ସୁବିଧାଗୁଡ଼ିକର ବିସ୍ତୃତ ବିବରଣୀ ଦିଆଯାଇଛି, ଯେଉଁଥିରେ ପକ୍କା ଘର, ବିଦ୍ୟୁତ୍, ନିର୍ମଳ ଜଳ ଏବଂ ପ୍ରତ୍ୟକ୍ଷ ଲାଭ ହସ୍ତାନ୍ତର, ୮୦ କୋଟିରୁ ଅଧିକ ନାଗରିକଙ୍କ ପାଇଁ ମାଗଣା ଖାଦ୍ୟ ଶସ୍ୟ ଏବଂ ୬୦ କୋଟିରୁ ଅଧିକ ଗରିବ ବ୍ୟକ୍ତିଙ୍କ ପାଇଁ ମାଗଣା ଚିକିତ୍ସା ଅନ୍ତର୍ଭୁକ୍ତ। ପ୍ରସ୍ତାବରେ ଉଲ୍ଲେଖ କରାଯାଇଛି ଯେ ଏହି ପ୍ରୟାସଗୁଡ଼ିକ ସାମୂହିକ ଭାବରେ ଜାତୀୟ ଆତ୍ମବିଶ୍ୱାସକୁ ବୃଦ୍ଧି କରିଛି ଏବଂ ୨୫ କୋଟିରୁ ଅଧିକ ଲୋକଙ୍କୁ ଦାରିଦ୍ର୍ୟକୁ ପରାସ୍ତ କରିବାରେ ସକ୍ଷମ କରିଛି।
ଏହି ପ୍ରସ୍ତାବରେ ପ୍ରମୁଖ ଜନସଂଖ୍ୟାଗତ ଗୋଷ୍ଠୀଗୁଡ଼ିକର ସଶକ୍ତୀକରଣ ସହ ଆଗକୁ ବଢ଼ିବା ପାଇଁ ଏକ ରୋଡମ୍ୟାପ୍ ଉପସ୍ଥାପନ କରାଯାଇଛି। ଏହା ଯୁବ ଶକ୍ତି ଉପରେ ଗୁରୁତ୍ବକୁ ସ୍ୱୀକାର କରେ ଯାହା ଭାରତକୁ ବିଶ୍ୱର ତୃତୀୟ ବୃହତ ଷ୍ଟାର୍ଟଅପ୍ ଇକୋସିଷ୍ଟମ ଏବଂ ମିଶନ ଚନ୍ଦ୍ରଯାନ ମାଧ୍ୟମରେ ଏକ ବୈଜ୍ଞାନିକ ଶକ୍ତି ହେବା ଦିଗରେ ଆଗେଇ ଆଣିଛି। ‘ମହିଳା ନେତୃତ୍ୱାଧୀନ ବିକାଶ’ର ଏକ ନୂତନ ଅଧ୍ୟାୟକୁ ଧୂମମୁକ୍ତ ରୋଷେଇ ଘର ଏବଂ ଲକ୍ଷପତି ଦିଦି ଅଭିଯାନ ଠାରୁ ଆରମ୍ଭ କରି ବିଧାନସଭାରେ ମହିଳାଙ୍କ ପାଇଁ ଐତିହାସିକ ୩୩ ପ୍ରତିଶତ ସଂରକ୍ଷଣ ପର୍ଯ୍ୟନ୍ତ ବ୍ୟାପକ ନୀତି ମାଧ୍ୟମରେ ବିସ୍ତୃତ ଭାବରେ ବର୍ଣ୍ଣନା କରାଯାଇଛି। ଚାଷୀମାନଙ୍କୁ ‘ବିକଶିତ ଭାରତ’ର ମୁଖ୍ୟ ସ୍ତମ୍ଭ ଭାବରେ ସ୍ୱୀକାର କରି, ଏହି ପ୍ରସ୍ତାବରେ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି,, ପଶୁପାଳକ ଏବଂ ମତ୍ସ୍ୟଜୀବୀଙ୍କ ପାଇଁ କିଷାନ କ୍ରେଡିଟ୍ କାର୍ଡ ଭଳି ପଦକ୍ଷେପଗୁଡ଼ିକୁ ପ୍ରଶଂସା କରାଯାଇଛି, ଯାହା କୃଷି ରପ୍ତାନିକୁ ୫ ଲକ୍ଷ କୋଟି ଟଙ୍କା ଅତିକ୍ରମ କରିବାରେ ସାହାଯ୍ୟ କରିଛି।
ଦୀର୍ଘଦିନ ଧରି ପଡ଼ି ରହିଥିବା ସଂସ୍କାର କାର୍ଯ୍ୟକାରୀ କରିବାରେ ପ୍ରଦର୍ଶିତ ନିର୍ଣ୍ଣାୟକ ‘ରାଷ୍ଟ୍ର ପ୍ରଥମ’ ମନୋଭାବକୁ ପ୍ରଶଂସା କରି, ପ୍ରସ୍ତାବରେ ଧାରା ୩୭୦ ରଦ୍ଦ, ଜିଏସଟି ଏବଂ ଓ୍ବାନ୍ ରାଙ୍କ ଓ୍ବାନ୍ ପେନସନ୍ (ଓଆର୍ଓପି) କାର୍ଯ୍ୟକାରୀ, ସିଏଏ ପ୍ରଣୟନ, ଭାରତୀୟ ନ୍ୟାୟ ସଂହିତା ଏବଂ ଶ୍ରମ ସଂହିତାର ଏକୀକରଣ ଭଳି ଗୁରୁତ୍ୱପୂର୍ଣ୍ଣ ସଫଳତାକୁ ପ୍ରଶଂସା କରାଯାଇଛି। ଏହି ପ୍ରସ୍ତାବରେ ଜାତୀୟ ସୁରକ୍ଷାକୁ ସର୍ବାଧିକ ପ୍ରାଥମିକତା ପ୍ରଦାନ କରାଯିବା ଉପରେ ଗୁରୁତ୍ୱ ଦିଆଯାଇଛି, ଯାହା ସର୍ଜିକାଲ ଏବଂ ସୀମାପାର ବିମାନ ଆକ୍ରମଣ, ‘ ଅପରେସନ ସିନ୍ଦୂର’, ପକ୍ଷପାତପୂର୍ଣ୍ଣ ସିନ୍ଧୁ ଜଳ ଚୁକ୍ତିନାମା ସ୍ଥଗିତ ରଖିବା ଏବଂ ଆତଙ୍କବାଦ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଦ୍ୱାରା ପ୍ରମାଣିତ ହୋଇଛି। ନକ୍ସଲବାଦର ନିରାକରଣ, ଉତ୍ତର-ପୂର୍ବରେ ସ୍ଥାୟୀ ଶାନ୍ତି ଚୁକ୍ତି ସ୍ୱାକ୍ଷର ଏବଂ ବାଂଲାଦେଶ ସହିତ ସୀମା ବିବାଦର ସମାଧାନରେ ମଧ୍ୟ ପ୍ରଶଂସନୀୟ ପ୍ରଗତି କଥା ଏଥିରେ ଉଲ୍ଲେଖ କରାଯାଇଛି।
ପ୍ରସ୍ତାବରେ ପ୍ରତିରକ୍ଷାଠାରୁ ଏଆଇ ପର୍ଯ୍ୟନ୍ତ କ୍ଷେତ୍ରରେ ହୋଇଥିବା ଭାରତୀୟ ଉତ୍ପାଦନର ପ୍ରଗତି ଓ ମେକ୍ ଇନ ଇଣ୍ଡିଆ ଓ ଆତ୍ମନିର୍ଭର ଭାରତ ଅଭିଯାନର ଅଗ୍ରଗତି ବିଷୟରେ ଉଲ୍ଲେଖ ରହିଛି। ଏହା ମଧ୍ୟ ସଫଳ ଜି୨୦ ଅଧ୍ୟକ୍ଷତା, ଅନ୍ତର୍ଜାତୀୟ ଯୋଗ ଦିବସ, ଅନ୍ତର୍ଜାତୀୟ ସୌର ମେଣ୍ଟ ଏବଂ ମିଶନ ଲାଇଫ୍ ଭଳି ପଦକ୍ଷେପ ମାଧ୍ୟମରେ ବିଶ୍ବ ମଞ୍ଚରେ ଭାରତର ବର୍ଦ୍ଧିତ ଭୂମିକା କଥା ଉଲ୍ଲେଖ କରିଛି। ବିକାଶ ଓ ଐତିହ୍ୟର ମିଳନରେ ଦେଶରେ ଆସିଥିବା ଏକ ସାଂସ୍କୃତିକ ନବଜାଗରଣ କଥା ଉଲ୍ଲେଖ କରାଯାଇଛି। ଏହାର ପ୍ରତୀକ ହୋଇଛି ନୂଆ ସଂସଦ ଭବନ ଓ କର୍ତ୍ତବ୍ୟ ପଥ ଏବଂ ଜନଭାଗୀଦାରିତା ମାଧ୍ୟମରେ କରୋନା ମହାମାରୀ ପରି ବୈଶ୍ବିକ ସଂକଟର ମୁକାବିଲା।
ଗତ ୧୨ ବର୍ଷର ରାଜନୈତିକ ସ୍ଥିରତା, ଗତିଶୀଳ ଶାସନ ଏବଂ ଦୂରଦୃଷ୍ଟିପୂର୍ଣ୍ଣ ନୀତି କିପରି ଭାରତକୁ ବିଶ୍ୱର ଦ୍ରୁତତମ ଅଭିବୃଦ୍ଧିଶୀଳ ପ୍ରମୁଖ ଅର୍ଥନୀତିରେ ପରିଣତ କରିଛି ତାହା ଉଲ୍ଲେଖ କରି, କେନ୍ଦ୍ର କ୍ୟାବିନେଟ୍ ଗଭୀର କୃତଜ୍ଞତା ଏବଂ ଭବିଷ୍ୟତର ସଂକଳ୍ପକୁ ପ୍ରକାଶ କରିବା ପାଇଁ ଆନୁଷ୍ଠାନିକ ଭାବରେ ନିମ୍ନଲିଖିତ ପ୍ରସ୍ତାବଗୁଡ଼ିକୁ ଗ୍ରହଣ କରିଛି:ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସବୁଠୁ ଅଧିକ ଦିନ ଯାଏ ଲଗାତାର ସେବା ପ୍ରଦାନ କରିଥିବା ନିର୍ବାଚିତ ପ୍ରଧାନମନ୍ତ୍ରୀ ହୋଇଛନ୍ତି । ତାଙ୍କ କାର୍ଯ୍ୟକାଳର ୪୩୯୯ ଦିନ ପୂରଣ ହେବା ଅବସରରେ ଭାରତ ମଣ୍ଡପମରେ ଏନଡିଏ ବୈଠକ ହୋଇଛି । ପିଏମ୍ ମୋଦୀ ଏହି ବୈଠକକୁ ସମ୍ୱୋଧନ ତାଙ୍କ କାର୍ଯ୍ୟକାଳ ସମୟରେ ବିକାଶ ଏବଂ କଂଗ୍ରେସର ବିଫଳତା କଥା କହିଛନ୍ତି । କଂଗ୍ରେସକୁ ସମାଲୋଚନା କରି କହିଛନ୍ତି, ହିନ୍ଦୁ ଗ୍ରୋଥ୍ ରେଟ୍ କଂଗ୍ରେସର ବିଫଳତାକୁ ଲୁଚାଇବା ପାଇଁ ଏକ ଉଦ୍ୟମ ଥିଲା ।
କଂଗ୍ରେସ ନେତୃତ୍ୱାଧୀନ ୟୁପିଏ ସରକାରଙ୍କ କାର୍ଯ୍ୟକାଳ କଥା ଉଲ୍ଲେଖ କରି ପ୍ରଧାନମନ୍ତ୍ରୀ କହିଛନ୍ତି, “ଦେଶ କଂଗ୍ରେସଠାରୁ ସ୍ୱାଧୀନତା ପାଇଲା । ସେମାନେ ଲୋକଙ୍କ ମନରେ ଏପରି ବିଶ୍ୱାସ ପୂରାଇଥିଲେ ଯେ ଭାରତରେ ବିକାଶ ମନ୍ଥର ହେବ । ସେମାନେ ଏହାକୁ ‘ହିନ୍ଦୁ ଗ୍ରୋଥ୍ ରେଟ୍’ ବୋଲି କହିଥିଲେ । ବିଫଳତା କଂଗ୍ରେସର ଥିଲା, କିନ୍ତୁ ଦୋଷ ହିନ୍ଦୁମାନଙ୍କ ଉପରେ ଲଗାଯାଇଥିଲା । ଏହାକୁ ‘କଂଗ୍ରେସ ଗ୍ରୋଥ୍ ରେଟ୍’ ବୋଲି କୁହାଯିବାର ଥିଲା ।”
ପ୍ରଧାନମନ୍ତ୍ରୀ ମୋଦୀ କହିଛନ୍ତି, “ମୁଁ କେବେ କଳ୍ପନା କରି ନଥିଲି ଯେ ମୋତେ ସବୁଠାରୁ ଅଧିକ ସମୟ ଧରି ନିର୍ବାଚିତ ପ୍ରଧାନମନ୍ତ୍ରୀ ଭାବରେ ସେବା କରିବାର ସୁଯୋଗ ମିଳିବ । ଏହା ମୋର ସୌଭାଗ୍ୟ । ଏସବୁ କେବଳ ଭଗବାନଙ୍କ କୃପାରୁ ସମ୍ଭବ ହୋଇପାରିଛି, ଏବଂ ମୋ ପାଇଁ ଲୋକମାନେ ହେଉଛନ୍ତି ଭଗବାନ । ଏହା ଏକ ଯଜ୍ଞ ଭଳି ହୋଇଛି ଯେଉଁଥିରେ ଆପଣମାନେ ସମସ୍ତେ ଯୋଗଦାନ ଦେଇଛନ୍ତି ।”
ପ୍ରଧାନମନ୍ତ୍ରୀ କହିଛନ୍ତି, “ଜନତା ମୋତେ ଏତେ ଦିନ ଧରି ସେମାନଙ୍କ ସେବା କରିବାର ସୁଯୋଗ ଦେଇଛନ୍ତି । ପୂର୍ବ ଦଶନ୍ଧିଗୁଡ଼ିକରେ, ଅସ୍ଥିରତା ଦେଶକୁ କ୍ଷତି ପହଞ୍ଚାଇଥିଲା ।” ସେ କହିଛନ୍ତି, ଆଜି ଲୋକମାନେ ଏକ ସ୍ଥିର ସରକାରଙ୍କ ଲାଭ ଦେଖୁଛନ୍ତି । କଂଗ୍ରେସ ଦ୍ୱାରା ବିଶ୍ୱାସଘାତକତା ପରେ, ଲୋକମାନେ ଆମ ଉପରେ ସେମାନଙ୍କର ବିଶ୍ୱାସ ରଖିଥିଲେ ଏବଂ ଆମେ ସେମାନଙ୍କର ବିଶ୍ୱାସକୁ ଦୃଢ଼ କରିଥିଲୁ । ୨୦୧୪ ମସିହାରେ ଆଶାର ଯେଉଁ ସୂର୍ଯ୍ୟ ଉଦୟ ହୋଇଥିଲା, ତାହା ଏବେ ବିଶ୍ୱାସର ଆଲୋକ ପାଲଟିଛି ।”
ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଗତ କିଛି ବର୍ଷ ମଧ୍ୟରେ ୨୫୦ ନିୟୁତ ଲୋକଙ୍କୁ ଦାରିଦ୍ର୍ୟରୁ ମୁକ୍ତ କରାଯାଇଛି, ଯାହା ସରକାରଙ୍କ ନୀତିଗୁଡ଼ିକୁ ସଠିକ୍ ବୋଲି ଦର୍ଶାଉଛି । ଏହା ସମସ୍ତ ଗରିବ ଲୋକଙ୍କୁ ଆତ୍ମବିଶ୍ୱାସ ଦେଇଛି ଯେ ସେମାନଙ୍କର ସ୍ୱପ୍ନ ସତ୍ୟ ହେବ । ମୋଦୀ ଗୁରୁତ୍ୱାରୋପ କରିଛନ୍ତି ଯେ ଲୋକଙ୍କ ଆଶା ପୂରଣ କରିବା ପାଇଁ ସରକାରଙ୍କୁ ଦିନରାତି କାମ କରିବାକୁ ପଡିବ ।
ପିଏମ୍ କହିଛନ୍ତି, “ଏହି ୧୨ ବର୍ଷ ମଧ୍ୟରେ ଏନଡିଏର ସଫଳତାର ଆଉ ଏକ ଗୁରୁତ୍ୱପୂର୍ଣ୍ଣ ଦିଗ ହେଉଛି ଯେ ଆମେ ବିଶ୍ୱ ଅସ୍ଥିରତା ଏବଂ ଅଶାନ୍ତିର ସମୟରେ ଏହାକୁ ହାସଲ କରିଛୁ । ଏହି ସମୟ ସ୍ଥିର ସରକାରର ଲାଭ ଦେଖିଛି । ଆମେ କୋଭିଡ୍ ମହାମାରୀ ସମୟକୁ କେବେ ଭୁଲିପାରିବୁ ନାହିଁ, ଯେତେବେଳେ ସବୁଠି ଅରାଜକତା ଏବଂ ସଙ୍କଟ ଥିଲା । ଭାରତ ସଫଳତାର ସହିତ ସଙ୍କଟକୁ ମୁକାବିଲା କରି ଆଗକୁ ବଢ଼ି ଚାଲିଛି । ବିଶ୍ୱର ପ୍ରମୁଖ ଦେଶଗୁଡ଼ିକର ଅର୍ଥନୀତି ସଂଘର୍ଷ କରୁଥିବା ବେଳେ, ଭାରତ ୨୦୨୫-୨୬ରେ ୭.୭% ଅଭିବୃଦ୍ଧି ହାର ହାସଲ କରିଛି ।”
