ଫ୍ରାନ୍ସରେ ଜି-୭ ସମ୍ମିଳନୀ ଅବସରରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ଦ୍ୱିପାକ୍ଷିକ ବୈଠକ ଅନୁଷ୍ଠିତ ହୋଇଛି । ଏହି ବୈଠକ ପରେ ଟ୍ରମ୍ପ ପିଏମ୍ ମୋଦୀଙ୍କୁ ଏକ ବଡ଼ ପ୍ରତିଶ୍ରୁତି ଦେଇଛନ୍ତି । ସେ କହିଛନ୍ତି ଯେ ଯଦି ଭାରତ ଉପରେ କୌଣସି ଆକ୍ରମଣ ହୁଏ, ତେବେ ଆମେ (ଆମେରିକା) ସାହାଯ୍ୟ ପାଇଁ ଆଗେଇ ଆସିବୁ ।
ଟ୍ରମ୍ପ ବୁଧବାର ପ୍ରଧାନମନ୍ତ୍ରୀ ମୋଦୀଙ୍କୁ ପ୍ରତିଶ୍ରୁତି ଦେଇ କହିଛନ୍ତି, “ଯଦି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କାର୍ଯ୍ୟକାଳ ମଧ୍ୟରେ ଭାରତ ଉପରେ ଆକ୍ରମଣ ହୁଏ, ତେବେ ଆମେରିକା ଭାରତର ସହାୟତା ପାଇଁ ଆଗକୁ ଆସିବ ।” ଦୁଇ ରାଷ୍ଟ୍ରାଧ୍ୟକ୍ଷଙ୍କ ମଧ୍ୟରେ ବୈଠକକୁ ବେଶ ଗୁରୁତ୍ୱପୂର୍ଣ୍ଣ ମନେ କରାଯାଉଛି, କାରଣ ଟ୍ରମ୍ପଙ୍କ ଦ୍ୱିତୀୟ କାର୍ଯ୍ୟକାଳରେ ଭାରତ ଓ ଆମେରିକା ସମ୍ପର୍କରେ ତିକ୍ତତା ଦେଖାଦେଇଥିଲା । ଟ୍ରମ୍ପଙ୍କ ଟାରିଫ୍ ନୀତି ଏବଂ କିଛି ବିବାଦୀୟ ବୟାନ ଯୋଗୁଁ ସମ୍ପର୍କ ପ୍ରଭାବିତ ହୋଇଥିଲା ।
ଡୋନାଲ୍ଡ ଟ୍ରମ୍ପ ପିଏମ୍ ମୋଦୀଙ୍କୁ ଜଣେ ‘କଠୋର ବ୍ୟବସାୟୀ’ (Tough Trader) ବୋଲି କହିଛନ୍ତି । ସେ କହିଛନ୍ତି ଯେ ଆମେରିକା ଓ ଭାରତ ବର୍ତ୍ତମାନ ଏକ ବାଣିଜ୍ୟ ଚୁକ୍ତି ଉପରେ କାମ କରୁଛନ୍ତି । ଗଣମାଧ୍ୟମର ପ୍ରଶ୍ନର ଉତ୍ତର ଦେଇ ଟ୍ରମ୍ପ ପିଏମ ମୋଦୀଙ୍କୁ ଜଣେ “ଶାନ୍ତ କିନ୍ତୁ ଦୃଢ଼ ବ୍ୟକ୍ତି” ବୋଲି କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ଯେପର୍ଯ୍ୟନ୍ତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଛନ୍ତି, ସେପର୍ଯ୍ୟନ୍ତ ସମଗ୍ର ବିଶ୍ୱରେ ଶାନ୍ତି ପ୍ରତିଷ୍ଠା କରିବାରେ ଭାରତର ଏକ ବଡ଼ ଭୂମିକା ରହିବ ।
ଉପସାଗରୀୟ ଅଞ୍ଚଳରେ ଆମେରିକାର ସାମରିକ କାର୍ଯ୍ୟାନୁଷ୍ଠାନରେ ନିହତ ତିନି ଜଣ ଭାରତୀୟ ନାବିକଙ୍କ ମୃତ୍ୟୁ ପାଇଁ ଟ୍ରମ୍ପ ସମବେଦନା ପ୍ରକାଶ କରିଛନ୍ତି । ହର୍ମୁଜ୍ ପ୍ରଣାଳୀରେ ଏକ ତୈଳ ଟ୍ୟାଙ୍କର ଉପରେ ଆମେରିକାର ଆକ୍ରମଣରେ ନିହତ ଭାରତୀୟ ନାବିକଙ୍କ ବିଷୟରେ ଏକ ପ୍ରଶ୍ନର ଉତ୍ତରରେ ଟ୍ରମ୍ପ କହିଛନ୍ତି, “ମୁଁ ଏହା ବିଷୟରେ ଶୁଣିଛି । ଏହା ଏକ କଷ୍ଟକର ବୃତ୍ତି । ଆମେ ଏହା ଉପରେ କାମ କରୁଛୁ ।”
ପ୍ରଧାନମନ୍ତ୍ରୀ ମୋଦୀଙ୍କ ବ୍ୟକ୍ତିତ୍ୱ ବିଷୟରେ ଉଲ୍ଲେଖ କରି ଆମେରିକା ରାଷ୍ଟ୍ରପତି କହିଛନ୍ତି, “ମୁଁ ପ୍ରଧାନମନ୍ତ୍ରୀ ମୋଦୀଙ୍କ ପରି ଶାନ୍ତ, ସଂଯମ ଏବଂ ଜବରଦସ୍ତ ନୁହେଁ… ତାଙ୍କୁ ଟିକେ ଦେଖନ୍ତୁ ।” ଆମେରିକା ରାଷ୍ଟ୍ରପତି ମୋଦୀଙ୍କୁ “ଏଞ୍ଜେଲ” ବୋଲି ମଧ୍ୟ କହିଥିଲେ । ଏହି ସମୟରେ କହିଥିଲେ, “ଯେପର୍ଯ୍ୟନ୍ତ ମୋଦୀ ଅଛନ୍ତି, ଭାରତ ବହୁତ ଭଲ କରିବ ।”
ସେପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ଅଭିଭାଷଣରେ ପଶ୍ଚିମ ଏସିଆରେ ଶାନ୍ତି ପ୍ରତିଷ୍ଠା ପାଇଁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରୟାସକୁ ସ୍ୱାଗତ କରିଥିଲେ । ଏହି ଅଞ୍ଚଳରେ ସ୍ଥାୟୀ ଶାନ୍ତି ପାଇଁ ଆଶା ପ୍ରକାଶ କରିଥିଲେ । ସେ ହର୍ମୁଜ୍ ଅବରୋଧ ଏବଂ ଭାରତୀୟ ନାବିକଙ୍କ ଉପରେ ଆକ୍ରମଣ ଯୋଗୁଁ ବିଶ୍ୱ ଅର୍ଥନୀତି ଉପରେ ପ୍ରତିକୂଳ ପ୍ରଭାବ ବିଷୟରେ ମଧ୍ୟ ଉଠାଇଥିଲେ । ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ସେମାନଙ୍କ ଶେଷ ବୈଠକ ପରଠାରୁ, ଦୁଇ ଦେଶ ସେମାନଙ୍କର ସହଯୋଗକୁ ଆହୁରି ମଜଭୁତ କରିଛନ୍ତି । ସେ କହିଛନ୍ତି, “ଏହା ଆମ ପାଇଁ ବହୁତ ଖୁସିର କଥା ଯେ ଉଭୟ ଦେଶର ଦଳ ଏକାଠି କାମ କରୁଛନ୍ତି ଏବଂ ନିର୍ଦ୍ଧାରିତ ଲକ୍ଷ୍ୟ ହାସଲ କରିବା ପାଇଁ ସମସ୍ତ ପ୍ରକାରର ପ୍ରୟାସ କରୁଛନ୍ତି । ଆମେ ବହୁତ ଦ୍ରୁତ ଗତିରେ ଆଗକୁ ବଢ଼ୁଛୁ।” ହର୍ମୁଜ୍ ପ୍ରଣାଳୀ ଅବରୋଧ ପ୍ରସଙ୍ଗ ଉଠାଇ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଏହି ସମୁଦ୍ର ପଥକୁ ଖୋଲା ରଖିବା ସମଗ୍ର ବିଶ୍ୱ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।
ଭାରତୀୟ ନାବିକଙ୍କ ସୁରକ୍ଷା ପ୍ରସଙ୍ଗ ଉଠାଇ ପ୍ରଧାନମନ୍ତ୍ରୀ ମୋଦୀ କହିଛନ୍ତି, “ଆମେ ସବୁବେଳେ କହିଆସିଛୁ ଯେ ସାମୁଦ୍ରିକ ନୌଚାଳନର ସ୍ୱାଧୀନତା ସୁନିଶ୍ଚିତ ହେବା ଆବଶ୍ୟକ, ଏବଂ ଆମକୁ ଏହା ଉପରେ ଗୁରୁତ୍ୱ ଦେବାକୁ ପଡିବ । ଲକ୍ଷ ଲକ୍ଷ ଭାରତୀୟ ନାବିକ ବିଶ୍ୱର ବିଭିନ୍ନ ମହାସାଗରରେ ସାମୁଦ୍ରିକ ବାଣିଜ୍ୟରେ କାମ କରୁଛନ୍ତି । ମୁଁ ବିଶ୍ୱାସ କରେ ଯେ ସେମାନଙ୍କର ସୁରକ୍ଷା ମଧ୍ୟ ସମାନ ଭାବରେ ଗୁରୁତ୍ୱପୂର୍ଣ୍ଣ… ମୁଁ ନିଶ୍ଚିତ ଯେ ଏହି ଚୁକ୍ତିରେ ନାବିକଙ୍କ ସୁରକ୍ଷା ସୁନିଶ୍ଚିତ ଏବଂ ପ୍ରାଥମିକତା ଦିଆଯିବ।”
