ଭାରତୀୟ ସଂସଦୀୟ ଇତିହାସରେ ଏକ ନାଟକୀୟ ମୋଡ଼ ଦେଖିବାକୁ ମିଳିଛି। ବହୁ ଚର୍ଚ୍ଚିତ ମହିଳା ସଂରକ୍ଷଣ ଏବଂ ସୀମା ପୁନଃନିର୍ଦ୍ଧାରଣ (Delimitation) ବିଲ୍ ଲୋକସଭାରେ ଗୃହୀତ ହୋଇପାରିନାହିଁ ବା କାଟ୍ ଖାଇଛି। ବିରୋଧୀଙ୍କ ପ୍ରବଳ ହଟ୍ଟଗୋଳ ଏବଂ କେତେକ ବୈଷୟିକ କାରଣରୁ ଏହି ଗୁରୁତ୍ୱପୂର୍ଣ୍ଣ ବିଲ୍ ଅଟକି ଯିବା ଫଳରେ ଆଗାମୀ ନିର୍ବାଚନୀ ରଣନୀତି ଉପରେ ଏହାର ବଡ଼ ପ୍ରଭାବ ପଡ଼ିବାର ସମ୍ଭାବନା ରହିଛି। ବିରୋଧୀ ଦଳଗୁଡ଼ିକ ମହିଳା ସଂରକ୍ଷଣ ଭିତରେ ଓବିସି (OBC) କୋଟା ପାଇଁ ଜିଦ୍ ଧରିବା ଏବଂ ସୀମା ପୁନଃନିର୍ଦ୍ଧାରଣକୁ ନେଇ ଦକ୍ଷିଣ ଭାରତୀୟ ରାଜ୍ୟଗୁଡ଼ିକର ଆପତ୍ତି ଯୋଗୁଁ ସରକାର ଅସୁବିଧାର ସମ୍ମୁଖୀନ ହୋଇଛନ୍ତି। ସୀମା ପୁନଃନିର୍ଦ୍ଧାରଣ ହେଲେ ଉତ୍ତର ଭାରତରେ ଆସନ ସଂଖ୍ୟା ବଢ଼ିବ ଏବଂ ଦକ୍ଷିଣ ଭାରତର ପ୍ରଭାବ କମିବ ବୋଲି ଆଶଙ୍କା କରାଯାଉଛି। ଯଦି ସୀମା ପୁନଃନିର୍ଦ୍ଧାରଣ ବିଲ୍ ପାସ୍ ନହୁଏ, ତେବେ ନୂଆ ନିର୍ବାଚନ ମଣ୍ଡଳୀ ଗଠନ ପ୍ରକ୍ରିୟା ବାଧାପ୍ରାପ୍ତ ହେବ। ଏହାଦ୍ୱାରା ୨୦୨୯ ଲୋକସଭା ନିର୍ବାଚନ ପୂର୍ବରୁ ଆସନ ବୃଦ୍ଧି ଯୋଜନା ଧିମେଇ ଯାଇପାରେ। ମହିଳା ସଂରକ୍ଷଣ ବିଲ୍ ଅଟକିବା ଦ୍ୱାରା ଶାସକ ଦଳ ମହିଳା ଭୋଟରଙ୍କୁ ଆକୃଷ୍ଟ କରିବା ପାଇଁ ଯେଉଁ ମାଷ୍ଟରପ୍ଲାନ୍ କରିଥିଲା, ସେଥିରେ ବାଧା ସୃଷ୍ଟି ହୋଇଛି। ଏହାକୁ ନେଇ ବିରୋଧୀମାନେ ଏବେ ସରକାରଙ୍କୁ ଘେରିବାକୁ ପ୍ରସ୍ତୁତ ହେଉଛନ୍ତି। ସରକାର ଏହି ବିଲ୍କୁ ପୁଣି ଥରେ ମାର୍ଜିତ ରୂପରେ ଆଣିବା ପାଇଁ ଏକ ସ୍ୱତନ୍ତ୍ର କମିଟି ଗଠନ କରିପାରନ୍ତି କିମ୍ବା ଆଗାମୀ ଅଧିବେଶନରେ ଏହାକୁ ପାରିତ କରିବାକୁ ଚେଷ୍ଟା କରିପାରନ୍ତି।ଲୋକସଭାରେ ଶୁକ୍ରବାର କାଟ୍ ଖାଇଛି ମହିଳା ସଂରକ୍ଷଣ ଏବଂ ସୀମା ପୁନଃନିର୍ଦ୍ଧାରଣ ବିଲ୍ । ସଂସଦରେ ବିଜେପିର ପରାଜୟ ହୋଇଛି, ହେଲେ ଏବେ ସଡ଼କରେ ହୋଇପାରେ ଅସଲି ସଂଗ୍ରାମ । ଲୋକସଭାରେ ଦୁଇ ଦିନ ଆଲୋଚନା ପରେ, ମହିଳା ସଂରକ୍ଷଣ ବିଲ୍ ଉପସ୍ଥାପିତ ହୋଇଥିଲା। ବିଲ୍ ସପକ୍ଷରେ ୨୯୮ ଏବଂ ବିପକ୍ଷରେ ୨୩୦ ଭୋଟ ପଡ଼ିଥିଲା ।
ପଶ୍ଚିମବଙ୍ଗ ଏବଂ ତାମିଲନାଡୁ ଭଳି ରାଜ୍ୟରେ, ଯେଉଁଠାରେ ବିଧାନସଭା ନିର୍ବାଚନ ଚାଲିଛି, ସେଠାରେ ବିଜେପି ଏହି ପ୍ରସଙ୍ଗକୁ ଜନସାଧାରଣଙ୍କ ସମ୍ମୁଖରେ ଉଠାଇବ। ବିଜେପି ଏହି ବାର୍ତ୍ତା ଦେବାକୁ ଚେଷ୍ଟା କରିବ ଯେ, ବିପକ୍ଷ ଦଳ ମହିଳା ବିରୋଧୀ ଏବଂ ଏହି ଐତିହାସିକ ସଂସ୍କାରକୁ ବାଧା ଦେଇଛି।
ପ୍ରଧାନମନ୍ତ୍ରୀ ମୋଦୀ ଏହି ବିଲ୍ ସମ୍ପର୍କରେ ଦେଶର ମହିଳାମାନଙ୍କୁ ଖାସ ଅପିଲ୍ କରିଥିଲେ । ଟ୍ୱିଟ୍ କରି ସେ ସମସ୍ତ ସଦସ୍ୟଙ୍କୁ ସେମାନଙ୍କର ମା, ଭଉଣୀ, ଝିଅ ଏବଂ ସ୍ତ୍ରୀମାନଙ୍କୁ ମନେ ରଖିବାକୁ ଏବଂ ସେମାନଙ୍କ ବିବେକର କଥା ଶୁଣିବାକୁ ଅନୁରୋଧ କରିଥିଲେ । ଦେଶର ମହିଳାମାନଙ୍କୁ ସେବା ଏବଂ ସମ୍ମାନ ଦେବା ପାଇଁ ଏହା ଏକ ସୁବର୍ଣ୍ଣ ସୁଯୋଗ। ସେମାନଙ୍କୁ ନୂତନ ସୁଯୋଗରୁ ବଞ୍ଚିତ କରନ୍ତୁ ନାହିଁ। ଏଭଳି କିଛି କରି ଭାରତର ମହିଳାଙ୍କ ଭାବନାକୁ ଆଘାତ ଦିଅନ୍ତୁ ନାହିଁ ବୋଲି କହିଥିଲେ ମୋଦୀ । ଲୋକସଭାରେ ତାଙ୍କ ଭାଷଣ ସମୟରେ ପ୍ରଧାନମନ୍ତ୍ରୀ ମୋଦୀ କହିଥିଲେ, ‘ଯଦି ବିରୋଧୀ ଦଳ ଶ୍ରେୟ ବିଷୟରେ ଚିନ୍ତିତ, ତେବେ ସେମାନେ ଏହି ବିଲ୍ ପାଇଁ ଶ୍ରେୟ ନେଇପାରିବେ। ଆମେ ସରକାରୀ ଖର୍ଚ୍ଚରେ ସେମାନଙ୍କର ଫଟୋ ଛାପିବାକୁ ମଧ୍ୟ ପ୍ରସ୍ତୁତ। କିନ୍ତୁ ବିରୋଧୀ ଦଳ ଏହି ବିଲକୁ ସମର୍ଥନ କରିବା ଉଚିତ।’
ଏହି ବିଲ୍ ଉପରେ ପ୍ରତିକ୍ରିୟା ଦେଇ ଅମିତ ଶାହ ବିରୋଧୀ ଦଳ ଉପରେ ବର୍ଷିଥିଲେ । ସେ କହିଥିଲେ ଯେ, ବିରୋଧୀ ଦଳ ମହିଳା ସଂରକ୍ଷଣର ବିରୋଧ କରୁଛି। ସେ କହିଛନ୍ତି ଯେ, ମହିଳା ସଂରକ୍ଷଣକୁ ବିରୋଧ କରିବାର ଇତିହାସ କଂଗ୍ରେସ ଦଳ ପାଖରେ ରହିଛି । ସେମାନେ ପ୍ରଥମେ ୧୯୯୨ ମସିହାରେ ଏକ ସମ୍ବିଧାନ ସଂଶୋଧନ ଆଣିଥିଲେ, ଯାହା ଦ୍ଵାରା ପଞ୍ଚାୟତରେ ମହିଳାମାନଙ୍କ ପାଇଁ ୩୩% ସଂରକ୍ଷଣ ଦେଇଥିଲେ। ସେ ଜଣେ କଂଗ୍ରେସ ପ୍ରଧାନମନ୍ତ୍ରୀ ଥିଲେ, କିନ୍ତୁ କଂଗ୍ରେସ ଦଳ ଏହାକୁ କେବେ ଗ୍ରହଣ କରି ନଥିଲା। ପରବର୍ତ୍ତୀ ସମୟରେ, ୧୯୯୬ ମସିହାରେ ଦେବେଗୌଡା ପ୍ରଧାନମନ୍ତ୍ରୀ ହୋଇଥିଲେ ଏବଂ ଏକ ସଂଶୋଧନ ମଧ୍ୟ ଆଣିଥିଲେ। ଗୀତା ମୁଖାର୍ଜୀ କମିଟି ଗଠନ କରାଯାଇଥିଲା। ରିପୋର୍ଟ ପ୍ରକାଶିତ ହେବା ପର୍ଯ୍ୟନ୍ତ, ଲୋକସଭା ଭଙ୍ଗ ହୋଇଯାଇଥିଲା।
