ନିକଟରେ ଆମେରିକା-ଇରାନ ଏବଂ ରୁଷ-ୟୁକ୍ରେନ ମଧ୍ୟରେ ହୋଇଥିବା ଯୁଦ୍ଧରେ କାମିକାଜେ ଡ୍ରୋନ୍ଗୁଡ଼ିକ ଅତ୍ୟନ୍ତ ପ୍ରଭାବଶାଳୀ ସାବ୍ୟସ୍ତ ହୋଇଛନ୍ତି। ଏଗୁଡ଼ିକ ସଠିକ୍ ଲକ୍ଷ୍ୟଭେଦ କରିବା ସହ ନିର୍ମାଣ ଖର୍ଚ୍ଚ ମଧ୍ୟ ବହୁତ କମ୍। ଏହାକୁ ଦୃଷ୍ଟିରେ ରଖି ଭାରତୀୟ ସେନା ନିକଟରେ ନିଜ ଅସ୍ତ୍ରଭଣ୍ଡାରରେ ୧୦୬ଟି ‘ଅଗ୍ନିବେଗ’ (Agniveg) ଟର୍ବୋଜେଟ୍ ଚାଳିତ କାମିକାଜେ ଡ୍ରୋନ୍ ସାମିଲ କରିଛି। ଭାରତୀୟ ବାୟୁସେନା ମଧ୍ୟ ସ୍ୱଦେଶୀ ଜ୍ଞାନକୌଶଳରେ ଏହିଭଳି ଅସ୍ତ୍ରଶସ୍ତ୍ର ଉତ୍ପାଦନ ଦିଗରେ ପଦକ୍ଷେପ ନେଉଛି, ଯାହା Loitering munitions ଉପରେ ଦେଶର ଧ୍ୟାନ କେନ୍ଦ୍ରିତ କରିଛି।
ଭାରତୀୟ ସେନାର ଶକ୍ତିରେ ଯୋଡ଼ି ହୋଇଛି ଏକ ନୂଆ ଏବଂ ସବୁଠାରୁ ମାରାତ୍ମକ ବ୍ରହ୍ମାସ୍ତ୍ର। ସେନାର ଆଧୁନିକୀକରଣ ଏବଂ ‘ମେକ୍ ଇନ୍ ଇଣ୍ଡିଆ’ (Make in India) ଅଭିଯାନକୁ ଏକ ବଡ଼ ସଫଳତା ପ୍ରଦାନ କରି ଭାରତୀୟ ସେନାରେ ଆଧିକାରିକ ଭାବେ ସାମିଲ ହୋଇଛି ସ୍ୱଦେଶୀ ଜ୍ଞାନକୌଶଳରେ ନିର୍ମିତ ସୁପର ଆଡଭାନ୍ସଡ୍ ‘ଅଗ୍ନିବେଗ’ କାମିକାଜେ ଡ୍ରୋନ୍ (Agniveg Kamikaze Drone)। ଏହି ଡ୍ରୋନ୍ ସେନାରେ ସାମିଲ ହେବା ପରେ ଏଲ୍ଏସି (LAC) ଏବଂ ଏଲ୍ଓସି (LoC) ରେ ଶତ୍ରୁ ଦେଶ ଚୀନ ଏବଂ ପାକିସ୍ତାନର ଯେକୌଣସି ଦୁଃସାହସର ମୁହଁତୋଡ଼ ଜବାବ ଦେବା ପାଇଁ ଭାରତୀୟ ସେନା ଆହୁରି ଅଧିକ ଶକ୍ତିଶାଳୀ ହୋଇପାରିଛି।
ପ୍ରତିରକ୍ଷା ବିଶେଷଜ୍ଞଙ୍କ ମତରେ, କାମିକାଜେ ଡ୍ରୋନ୍କୁ ସାଧାରଣ ଭାଷାରେ ‘ସୁଇସାଇଡ୍ ଡ୍ରୋନ୍’ (Suicide Drone) ବୋଲି କୁହାଯାଏ। ଏହି ଡ୍ରୋନ୍ ନିଜ ସାଙ୍ଗରେ ଶକ୍ତିଶାଳୀ ବିସ୍ଫୋରକ (Warhead) ବହନ କରି ଉଡ଼ାଣ ଭରିଥାଏ। ଏହା କେବଳ ଶତ୍ରୁ ଶିବିର ଉପରୁ ବୋମା ବର୍ଷଣ କରେନାହିଁ, ବରଂ ନିଜେ ଯାଇ ସିଧାସଳଖ ଶତ୍ରୁର ବଙ୍କର, ଟ୍ୟାଙ୍କ କିମ୍ବା ସେନା ଗାଡ଼ି ଉପରେ ମାଡ଼ ହୋଇ ନିଜକୁ ବିସ୍ଫୋରଣ କରିଦେଇଥାଏ। ‘ଅଗ୍ନିବେଗ’ ଡ୍ରୋନ୍ ନିଜର ଅଦୃଶ୍ୟ ରଡାର୍ ଟେକ୍ନୋଲୋଜି (Stealth Capability) ବଳରେ ଶତ୍ରୁର ଆଖିରେ ଧୂଳି ଦେଇ ସଠିକ୍ ଟାର୍ଗେଟ୍କୁ ଧ୍ୱଂସ କରିବାରେ ଶତପ୍ରତିଶତ ସକ୍ଷମ।
ଏହାର ନାମ ଅନୁସାରେ ଏହି ଡ୍ରୋନ୍ ଅଗ୍ନି ଭଳି ଅତି ଦ୍ରୁତ ବେଗରେ ଶତ୍ରୁ ଶିବିର ଆଡ଼କୁ ଗତି କରିଥାଏ। ଏହା ସୀମା ଆରପାରିରେ ଥିବା ଶତ୍ରୁର ଘାଟିକୁ ଅତି ସହଜରେ ଚିହ୍ନଟ କରି ଆକ୍ରମଣ କରିପାରିବ।
ଏହି ଡ୍ରୋନ୍ ସମ୍ପୂର୍ଣ୍ଣ ଭାବେ ଏଆଇ (AI) ଏବଂ ଜିପିଏସ୍ ଆଣ୍ଟି-ଜାମିଂ ଟେକ୍ନୋଲୋଜି ଦ୍ୱାରା ପରିଚାଳିତ। ଶତ୍ରୁ ଯଦି ଏହାର ସିଗନାଲ୍ ବ୍ଲକ୍ କରିବାକୁ ଚେଷ୍ଟା କରେ, ତେବେ ବି ଏହା ନିଜର ଅଟୋମେଟିକ୍ ସିଷ୍ଟମ୍ ବଳରେ ଲକ୍ଷ୍ୟସ୍ଥଳକୁ ଆକ୍ରମଣ କରିବାରେ ପଛାଇବ ନାହିଁ।
‘ଅଗ୍ନିବେଗ’ ଡ୍ରୋନ୍ ରାତିର ଅନ୍ଧକାର ଏବଂ ଖରାପ ପାଗରେ ମଧ୍ୟ ସମାନ ଭାବେ ଶତ୍ରୁ ଉପରେ କଡ଼ା ନଜର ରଖି ସର୍ଜିକାଲ୍ ଷ୍ଟ୍ରାଇକ୍ କରିବାକୁ ସମ୍ପୂର୍ଣ୍ଣ ପ୍ରସ୍ତୁତ।
ଆଧୁନିକ ଯୁଦ୍ଧ କୌଶଳରେ ଡ୍ରୋନ୍ର ଭୂମିକା ସବୁଠାରୁ ଗୁରୁତ୍ୱପୂର୍ଣ୍ଣ ସାଜିଛି। ଋଷ-ୟୁକ୍ରେନ ଯୁଦ୍ଧରେ ମଧ୍ୟ କାମିକାଜେ ଡ୍ରୋନ୍ର ବ୍ୟାପକ ପ୍ରଭାବ ଦେଖିବାକୁ ମିଳିଛି। ଏଭଳି ସ୍ଥିତିରେ ଭାରତୀୟ ସେନାରେ ଏହି ସ୍ୱଦେଶୀ ‘ଅଗ୍ନିବେଗ’ ସାମିଲ ହେବା ଦେଶର ସୀମା ସୁରକ୍ଷା ଏବଂ ସାମରିକ ପ୍ରସ୍ତୁତିକୁ ଏକ ନୂଆ ଉଚ୍ଚତା ପ୍ରଦାନ କରିଛି, ଯାହା ଶତ୍ରୁ ଦେଶଗୁଡ଼ିକର ନିଦ ହଜାଇ ଦେବା ପାଇଁ ଯଥେଷ୍ଟ।
