ଦୀର୍ଘ ୫୦ରୁ ଅଧିକ ବର୍ଷ ଧରି ଦ୍ରାବିଡ଼ ରାଜନୀତିର ଗଡ଼ ଥିବା ତାମିଲନାଡ଼ୁରେ ଏବେ ବଡ଼ ରାଜନୈତିକ ପରିବର୍ତ୍ତନ ଦେଖିବାକୁ ମିଳିଛି। ଡିଏମ୍କେ ଏବଂ ଏଆଇଏଡିଏମ୍କେର ଦବ୍ଦବା ରହି ଆସିଥିବା ତାମିଲନାଡ଼ୁରେ ବିଜୟଙ୍କ ଦମ୍ଦାର ପ୍ରଦର୍ଶନ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଡିଏମ୍କେକୁ ପଛରେ ପକାଇ ବିଜୟଙ୍କ ଟିଭିକେ (ତାମିଲଗା ଭେଟ୍ରି କାଜାଗମ୍) ତାମିଲନାଡ଼ୁରେ ବାଜି ମାରିନେଇଛି। ଟିଭିକେ ରାଜ୍ୟରେ ସବୁଠାରୁ ବଡ଼ ଶକ୍ତିଭାବେ ଉଭା ହୋଇ ଡିଏମ୍କେ ଏବଂ ଏଆଇଏଡିଏମ୍କେର ଦୀର୍ଘକାଳୀନ ପ୍ରଭାବକୁ ଭାଙ୍ଗି ଦେଇଛି। ଟିଭିକେ ତାମିଲନାଡ଼ୁରେ ଏକକ ବୃହତ୍ତମ ଦଳ ହୋଇ ଚମତ୍କାର ବିଜୟ ହାସଲ କରିଛି । ଏଆଇଏଡିଏମ୍କେ ଦ୍ବିତୀୟ ବୃହତ୍ତମ ଦଳ ହୋଇଥିବାବେଳେ ଡିଏମ୍କେ ତୃତୀୟ ସ୍ଥାନକୁ ଚାଲିଯାଇଛି। କିନ୍ତୁ ଟିଭିକେ ଏକକ ବୃହତ୍ତମ ଦଳ ହୋଇଥିଲେ ସୁଦ୍ଧା ଏହା ସରକାର ଗଠନ ପାଇଁ ଆବଶ୍ୟକୀୟ ସଂଖ୍ୟା (୧୧୮) ହାସଲ କରିପାରିନଥିବାରୁ ଏବେ ବିଜୟଙ୍କ ପରବର୍ତ୍ତୀ ପଦକ୍ଷେପ ଉପରେ ସମସ୍ତଙ୍କ ନଜର ରହିଛି।
ଭୋଟ ଗଣନା ଜାରି ରହିଥିବା ବେଳେ, ପ୍ରାରମ୍ଭିକ ଟ୍ରେଣ୍ଡରେ ବିଜୟଙ୍କ ଟିଭିକେ ୧୧୦ଟି ଆସନରେ ଆଗୁଆ ରହିଥିବାବେଳେ ଶାସକ ଡିଏମ୍କେ ମାତ୍ର ୪୦ଟି ଆସନରେ ଆଗୁଆ ଅଛି। ଏଆଇଏଡିଏମକେ ଏହାର ଗ୍ରାମାଞ୍ଚଳ ଆଧାରର ଅଧିକାଂଶ ଅଂଶ ବଜାୟ ରଖିଛି ଏବଂ ୬୪ଟି ଆସନରେ ଆଗୁଆ ରହି ଦ୍ୱିତୀୟ ବୃହତ୍ତମ ଦଳ ଭାବରେ ଉଭା ହୋଇଛି। ଟିଭିକେ ଚେନ୍ନାଇ ଅଞ୍ଚଳରେ ବଡ଼ ବିଜୟ ହାସଲ କରିଛି। ଚେନ୍ନାଇରେ ଟିଭିକେ ୩୭ଟି ଆସନରୁ ୩୧ଟିରେ ଆଗୁଆ ରହିଛି। ଏହା ୬୫ଟି ସହରାଞ୍ଚଳ ନିର୍ବାଚନମଣ୍ଡଳୀରୁ ୪୯ଟିରେ ମଧ୍ୟ ଆଗରେ ଅଛି ଯାହା ଡିଏମ୍କେ ପାଇଁ ବଡ଼ କ୍ଷତି ବିବେଚନା କରାଯାଉଛି। ଦକ୍ଷିଣ ତାମିଲନାଡୁରେ ମଧ୍ୟ ଦଳ ୫୮ ଟି ଆସନରୁ ୨୭ ଟିରେ ଆଗୁଆ ରହି ସବୁଠାରୁ ବଡ଼ ଶକ୍ତି ଭାବରେ ଉଭା ହୋଇଛି। ଏଆଇଏଡିଏମ୍କେ ୧୧୬ ଗ୍ରାମୀଣ ଆସନରୁ ୪୯ଟିରେ ଆଗୁଆ ରହି ଏହାର ଗ୍ରାମୀଣ ଆଧାର ବଜାୟ ରଖିଛି। ତଥାପି, ଟିଭିକେ ଏଠାରେ ୩୩ଟି ଆସନରେ ଆଗୁଆ ରହି ଗୁରୁତ୍ୱପୂର୍ଣ୍ଣ ପ୍ରବେଶ କରିଛି। ଇତି ମଧ୍ୟରେ ବିଜୟ ପେରାମ୍ବୁର ଏବଂ ତ୍ରିଚି ପୂର୍ବ ଉଭୟ ଆସନରେ ଆଗୁଆ ଅଛନ୍ତି। କିନ୍ତୁ ମୁଖ୍ୟମନ୍ତ୍ରୀ ଏମ୍କେ ଷ୍ଟାଲିନ କୋଲାଥୁରରେ ଜଣେ ଟିଭିକେ ପ୍ରାର୍ଥୀଙ୍କଠାରୁ ପଛରେ ଅଛନ୍ତି। ଟିଭିକେ ସୁନାମୀ ଅନ୍ୟ ଦଳର ଅନେକ ଶୀର୍ଷ ନେତାଙ୍କୁ ମଧ୍ୟ ଭସାଇ ନେଇଛି। ବିଜେପି ନେତା ଏବଂ ତେଲେଙ୍ଗାନାର ପୂର୍ବତନ ରାଜ୍ୟପାଳ ତାମିଲିସାଇ ସୌନ୍ଦରରାଜନ ଚେନ୍ନାଇର ମାଇଲାପୋରରେ ପଛରେ ଅଛନ୍ତି। ତାମିଲନାଡୁର ବିଜେପି ମୁଖ୍ୟ ନୈନାର ନାଗେନ୍ଦ୍ରନ ସତ୍ତୁରରେ ପଛରେ ଅଛନ୍ତି ଏବଂ ବରିଷ୍ଠ ଏଆଇଏଡିଏଏମ୍କେ ନେତା ବି ଭାଲାରମାଥି ଥାଉଜାଣ୍ଡ ଲାଇଟ୍ସ ଆସନରେ ପଛରେ ଅଛନ୍ତି।
