ଭୁବନେଶ୍ୱର: କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ ସୋସିଆଲ ମିଡିଆରେ ଚାଲିଥିବା ମିଥ୍ୟା ଓ ବିଭ୍ରାନ୍ତିକର ଅପପ୍ରଚାର ଉପରୁ ପରଦା ହଟାଇଛନ୍ତି ରାଜ୍ୟ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ। କେନ୍ଦ୍ରମନ୍ତ୍ରୀଙ୍କୁ ବଦନାମ କରିବା ପାଇଁ ଏକ ସୁଚିନ୍ତିତ ରଣନୀତି ଅନୁଯାୟୀ ଏଭଳି ହୀନ ପ୍ରୟାସ କରାଯାଉଥିବା ନେଇ ଆଇନ ମନ୍ତ୍ରୀ ଏବଂ ଦଳର ଅନ୍ୟ ବରିଷ୍ଠ ନେତାମାନେ ପ୍ରେସ୍ ମିଟ୍ କରି ଗୁରୁତ୍ୱପୂର୍ଣ୍ଣ ସ୍ପଷ୍ଟୀକରଣ ଦେଇଛନ୍ତି।
ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି ଯେ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବଢ଼ୁଥିବା ରାଜନୈତିକ ସଫଳତା ଓ ଜନପ୍ରିୟତାକୁ ଦେଖି କିଛି ବିରୋଧୀ ଗୋଷ୍ଠୀ ଈର୍ଷାନ୍ଵିତ ହୋଇପଡ଼ିଛନ୍ତି। ସେଥିପାଇଁ ସୋସିଆଲ ମିଡିଆ ପ୍ଲାଟଫର୍ମରେ ତାଙ୍କ ସ୍ୱଚ୍ଛ ଭାବମୂର୍ତ୍ତିକୁ ନଷ୍ଟ କରିବା ଉଦ୍ଦେଶ୍ୟରେ ଲଗାତାର ଭାବେ ମିଥ୍ୟା ଏବଂ ଭିତ୍ତିହୀନ ତଥ୍ୟ ଭାଇରାଲ୍ କରାଯାଉଛି। କେବଳ କେନ୍ଦ୍ରମନ୍ତ୍ରୀ ନୁହଁନ୍ତି, ବରଂ ଦେଶର ପ୍ରଧାନମନ୍ତ୍ରୀଙ୍କ ବିରୋଧରେ ମଧ୍ୟ କୌଣସି ପ୍ରମାଣ ନଥାଇ ଏଭଳି ବିଭ୍ରାନ୍ତିକର ପ୍ରଚାର କରାଯାଉଛି।
ଆଇନ ମନ୍ତ୍ରୀଙ୍କ ସୂଚନା ମୁତାବକ, ଏହି ସମ୍ପୂର୍ଣ୍ଣ ଅପପ୍ରଚାର ପଛରେ କଂଗ୍ରେସ ଏବଂ ଅନ୍ୟ କିଛି ନିର୍ଦ୍ଦିଷ୍ଟ ଦଳର ହାତ ରହିଛି। ସେମାନେ ବିଭିନ୍ନ ସମୟରେ ‘ଟୁଲକିଟ୍’ ବ୍ୟବହାର କରି ସରକାର ଓ ଜନପ୍ରିୟ ନେତାମାନଙ୍କୁ ଟାର୍ଗେଟ୍ କରିବାକୁ ଚେଷ୍ଟା କରୁଛନ୍ତି, ଯାହା ଏବେ ସମ୍ପୂର୍ଣ୍ଣ ମିଛ ବୋଲି ପ୍ରମାଣିତ ହୋଇସାରିଛି। ବଡ଼ କଥା ହେଉଛି, ଏହି ମାମଲାର ଯାଞ୍ଚ ପ୍ରକ୍ରିୟାରୁ ଜଣାପଡ଼ିଛି ଯେ ଏହି ସମସ୍ତ ଫେକ୍ ପୋଷ୍ଟଗୁଡ଼ିକ ଭାରତରୁ ନୁହେଁ, ବରଂ କ୍ରୋଏସିଆର ଏକ ଆଇପି (IP) ଆଡ୍ରେସ୍ ବ୍ୟବହାର କରି ବିଦେଶରୁ ଅପରେଟ୍ ଏବଂ ଭାଇରାଲ୍ କରାଯାଉଛି।
ସୋସିଆଲ ମିଡିଆରେ ଚାଲିଥିବା ବିବାଦର ସତ୍ୟତା ସାମ୍ନାକୁ ଆଣି ଶ୍ରୀ ହରିଚନ୍ଦନ ସ୍ପଷ୍ଟ କରିଛନ୍ତି ଯେ, ଆମେରିକାରେ ରହୁଥିବା ରାଜେନ୍ଦ୍ର ମହାପାତ୍ରଙ୍କ ସହ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କର କୌଣସି ପ୍ରକାରର ସମ୍ପର୍କ କିମ୍ବା ଆଦାନପ୍ରଦାନ ନାହିଁ। ସେହିପରି ଚର୍ଚ୍ଚାରେ ଥିବା ଡ. ଆର. ଜୟରାମନ୍ ମଧ୍ୟ ନିଜ ପକ୍ଷରୁ ସ୍ପଷ୍ଟୀକରଣ ଦେଇ କହିଛନ୍ତି ଯେ, ସେ କେନ୍ଦ୍ରମନ୍ତ୍ରୀଙ୍କୁ କେବେବି ବ୍ୟକ୍ତିଗତ ଭାବେ ଭେଟିନାହାନ୍ତି। ତେଣୁ ବିରୋଧୀଙ୍କ ଦ୍ୱାରା ପ୍ରସ୍ତୁତ କରାଯାଇଥିବା ସମସ୍ତ କାହାଣୀ ସମ୍ପୂର୍ଣ୍ଣ କଳ୍ପିତ।
ଏହି ପ୍ରସଙ୍ଗରେ ବିଜେପି ନେତା ଅନିଲ ବିଶ୍ଵାଲ ଜନସାଧାରଣଙ୍କୁ ଏକ ବିଶେଷ ଅନୁରୋଧ କରିଛନ୍ତି। ସେ କହିଛନ୍ତି ଯେ, ସୋସିଆଲ ମିଡିଆରେ ଭାଇରାଲ୍ ହେଉଥିବା ଏଭଳି ମିଥ୍ୟା ଅପପ୍ରଚାର ଓ ଏଜେଣ୍ଡାଭିତ୍ତିକ ପୋଷ୍ଟଗୁଡ଼ିକ ଠାରୁ ଲୋକେ ଦୂରେଇ ରହିବା ଆବଶ୍ୟକ। ଜନସାଧାରଣ କୌଣସି ଗୁଜବରେ ନପଡ଼ି କେବଳ ସତ୍ୟ, ପ୍ରମାଣିତ ଏବଂ ନିର୍ଭରଯୋଗ୍ୟ ଖବର ଉପରେ ହିଁ ବିଶ୍ୱାସ ପ୍ରକଟ କରନ୍ତୁ ବୋଲି ସେ ଆହ୍ୱାନ ଦେଇଛନ୍ତି।
