ପ୍ରଶ୍ନପତ୍ର ଲିକ୍ ବିରୁଦ୍ଧରେ ଆନ୍ଦୋଳନ ତେଜିବା ପରେ ସରକାର ପୂରା ଆକ୍ସନ ମୋଡ଼କୁ ଆସିଛନ୍ତି । ନିଜେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସବୁ ଦାୟିତ୍ୱ ନିଜ ହାତକୁ ନେଇଛନ୍ତି । ପରୀକ୍ଷାକୁ ସ୍ୱଚ୍ଛ ଏବଂ ତ୍ରୁଟିଶୂନ୍ୟ କରିବା ପାଇଁ ତାଙ୍କ ସରକାରଙ୍କ ପ୍ରତିବଦ୍ଧତାକୁ ଲଗାତାର ଦୋହରାଇଛନ୍ତି । ଫାଷ୍ଟ ଟ୍ରାକ୍ କୋର୍ଟ, ୧୦ ବର୍ଷ ଜେଲ୍ ଦଣ୍ଡଠାରୁ ଆରମ୍ଭ କରି ୧୦ କୋଟି ଟଙ୍କା ଜରିମାନା ପ୍ରାବଧାନ ବ୍ୟବସ୍ଥା କରାଯାଉଛି । ଏହାରି ଭିତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୁଣି ଏକ ସର୍ଟ ଭିଡିଓ ସେୟାର କରି ବଡ଼ ଘୋଷଣା କରିଛନ୍ତି ।
ଦେଶରେ ପରୀକ୍ଷା ସଂସ୍କାର ପାଇଁ ଟାସ୍କ ଫୋର୍ସ ଗଠନ କରିଛନ୍ତି ସରକାର । ପ୍ରଧାନମନ୍ତ୍ରୀ ମୋଦୀ ନିଜ ଭିଡିଓ କରି ଏହି ସୂଚନା ଦେଇଛନ୍ତି । ସେ କହିଛନ୍ତି, “ଫ୍ରେଣ୍ଡ୍ସ, ବିଦ୍ୟାର୍ଥୀଙ୍କ ଭବିଷ୍ୟତ ପାଇଁ ଭାରତ ସରକାର ଲଗାତାର ଅନେକ ପଦକ୍ଷେପ ନେଉଛନ୍ତି । ଯେଉଁ ଲୋକମାନେ ବିଦ୍ୟାର୍ଥୀଙ୍କ ଜୀବନ ସହ ଖେଳିଛନ୍ତି, ସେମାନେ ଜେଲ୍ ଭିତରେ ଅଛନ୍ତି । ଆମେ ଫାଷ୍ଟ ଟ୍ରାକ୍ କୋର୍ଟ କରିସାରିଛୁ, ପାର୍ଲାମେଣ୍ଟ ଭିତରେ ବି କଠୋର ଆଇନ ସହ ନୂଆ ଆଇନ ପ୍ରଣୟନ କରିବା ଦିଗରେ ଆଗକୁ ବଢୁଛୁ । କିନ୍ତୁ ଆମକୁ ଭବିଷ୍ୟତ ପାଇଁ ଚିନ୍ତା କରିବାର ଅଛି ।”ପ୍ରଧାନମନ୍ତ୍ରୀ କହିଛନ୍ତି, “ଆମ ପରୀକ୍ଷା ପଦ୍ଧତି ବିଶ୍ୱସ୍ତ ହେଉ, ଟ୍ରାନ୍ସପେରେଣ୍ଟ ହେଉ । ଆମ ପରୀକ୍ଷା ପଦ୍ଧତି ସର୍ବାଧିକ ଟେକ୍ନୋଲୋଜିର ବ୍ୟବହାର ହେଉ । ଏହି ସବୁକୁ ଦୃଷ୍ଟିରେ ରଖି ବିଶ୍ୱ ପ୍ରସିଦ୍ଧ ଟେକ୍ନୋଲୋଜି ଏକ୍ସପର୍ଟ ନନ୍ଦନ ନିଲେକଣିଙ୍କ ନେତୃତ୍ୱରେ ଏକ ହାଇ ପାୱାର ଟାସ୍କ ଫୋର୍ସ ଗଠନ ପାଇଁ ନିଷ୍ପତ୍ତି ନିଆଯାଇଛି । ଏହି ଟାସ୍କ ଫୋର୍ସ ପରୀକ୍ଷା ସଂସ୍କାର ଉପରେ ଫୋକସ୍ କରିବ ଏବଂ ଭବିଷ୍ୟତ ପରୀକ୍ଷାଗୁଡ଼ିକ ପ୍ରତି ବିଶ୍ୱାସକୁ ସୁନିଶ୍ଚିତ କରିବା କାମ ଏହି ରିପୋର୍ଟ ଆଧାରରେ କରାଯିବ ।”
