ଗଣତନ୍ତ୍ରର ଚତୁର୍ଥ ସ୍ତମ୍ଭ ଭଳି ନ୍ୟାୟପାଳିକା ହେଉଛି ସାଧାରଣ ଜନତାଙ୍କ ଆସ୍ଥାର କେନ୍ଦ୍ରବିନ୍ଦୁ। ଆଉ ଏହି ନ୍ୟାୟ ପ୍ରଦାନ ପ୍ରକ୍ରିୟାରେ ଆଇନଜୀବୀ ବା ଓକିଲମାନେ ପ୍ରମୁଖ ସେତୁ ଭାବେ କାର୍ଯ୍ୟ କରିଥାନ୍ତି। ତେବେ ସମାଜକୁ ନ୍ୟାୟ ଦେବାରେ ଦିନରାତି ଏକ କରୁଥିବା ଆଇନଜୀବୀମାନଙ୍କ ଆର୍ଥିକ ନିରାପତ୍ତା ଓ ସାମାଜିକ ସୁରକ୍ଷା ଅନେକ ସମୟରେ ଅବହେଳିତ ହୋଇ ରହିଯାଏ। ଏଭଳି ସ୍ଥିତିରେ ରାଜ୍ୟ ସରକାରଙ୍କ ପକ୍ଷରୁ ଆଇନଜୀବୀ କଲ୍ୟାଣ ପାଣ୍ଠିର ଆର୍ଥିକ ସହାୟତାକୁ ୪୦ ପ୍ରତିଶତ ବୃଦ୍ଧି କରିବା କେବଳ ଏକ ସରକାରୀ ଘୋଷଣା ନୁହେଁ, ବରଂ ଏହା ଆଇନଜୀବୀ ସମାଜ ପ୍ରତି ଏକ ସମ୍ମାନ ଓ ସେମାନଙ୍କ ସୁରକ୍ଷା ଦିଗରେ ଏକ ଦୃଢ଼ ପଦକ୍ଷେପ।
ଗତ କିଛି ବର୍ଷ ମଧ୍ୟରେ ବଜାର ଦର ଏବଂ ଜୀବନଧାରଣର ଖର୍ଚ୍ଚ ଯେଭଳି ଭାବେ ବଢ଼ିଛି, ସେହି ଅନୁପାତରେ ପୂର୍ବରୁ ମିଳୁଥିବା ସହାୟତା ରାଶି ଯଥେଷ୍ଟ ନଥିଲା। ୪୦% ବୃଦ୍ଧି ନିଶ୍ଚିତ ଭାବେ ସେମାନଙ୍କ ପରିବାରକୁ ଆର୍ଥିକ ସ୍ଥିରତା ଦେବାରେ ସହାୟକ ହେବ। ଆଇନ ବୃତ୍ତିର ପ୍ରାରମ୍ଭିକ ବର୍ଷଗୁଡ଼ିକରେ ସଂଘର୍ଷ ବହୁତ ଅଧିକ ଥାଏ। ଜଣେ ଜୁନିଅର ଆଇନଜୀବୀଙ୍କୁ ନିଜର ସ୍ଥିତି ସଜାଡ଼ିବାକୁ ବେଶ୍ ସମୟ ଲାଗେ। ଏଭଳି କଲ୍ୟାଣକାରୀ ଯୋଜନାର ସୁଧାର ସେମାନଙ୍କ ମଧ୍ୟରେ ଭବିଷ୍ୟତକୁ ନେଇ ଥିବା ଆଶଙ୍କା ଦୂର କରିବ। ଦୁର୍ଘଟଣା, ଅସୁସ୍ଥତା କିମ୍ବା ଆକସ୍ମିକ ମୃତ୍ୟୁ ଭଳି ଦୁର୍ଦ୍ଦିନ ସମୟରେ ଏହି ପାଣ୍ଠି ଓକିଲ ଓ ସେମାନଙ୍କ ନିର୍ଭରଶୀଳ ପରିବାର ପାଇଁ ସଞ୍ଜୀବନୀ ସଦୃଶ କାର୍ଯ୍ୟ କରିଥାଏ। ରାଶି ବୃଦ୍ଧି ପାଇବା ଦ୍ୱାରା ସଙ୍କଟ ସମୟରେ ପରିବାର ସମ୍ମାନର ସହ ମୁଣ୍ଡ ଟେକି ରହିପାରିବେ। ଏହାଦ୍ୱାରା ବୃତ୍ତିଗତ ପ୍ରତିବଦ୍ଧତା ଆହୁରି ସୁଦୃଢ଼ ହେବ। ଯେତେବେଳେ ଜଣେ ଆଇନଜୀବୀ ନିଜ ଭବିଷ୍ୟତ ଓ ପରିବାରକୁ ନେଇ ସୁରକ୍ଷିତ ଅନୁଭବ କରିବେ, ସେତେବେଳେ ସେ ଆହୁରି ମନୋନିବେଶ କରି ଗରିବ ଓ ଅସହାୟ ଲୋକଙ୍କୁ ନ୍ୟାୟ ଦେବା ପାଇଁ ଲଢ଼ିପାରିବେ।
ଜଣେ ଆଇନଜୀବୀ ସମାଜରେ ଆଇନର ଶାସନ ବଜାୟ ରଖିବାରେ ମୁଖ୍ୟ ଭୂମିକା ଗ୍ରହଣ କରନ୍ତି। ସେମାନଙ୍କ କଲ୍ୟାଣ ପାଇଁ ନିଆଯାଇଥିବା ଏହି ୪୦ ପ୍ରତିଶତ ସହାୟତା ରାଶି ବୃଦ୍ଧି ନିଷ୍ପତ୍ତି କେବଳ ଆବଶ୍ୟକ ନଥିଲା, ବରଂ ଏହା ବହୁ ଦିନରୁ ପ୍ରତୀକ୍ଷିତ ଥିଲା। ଏହି ପଦକ୍ଷେପ ରାଜ୍ୟର ସମଗ୍ର ଆଇନଜୀବୀ ସମାଜକୁ ଏକ ନୂଆ ଦିଗ ଓ ସାମାଜିକ ସୁରକ୍ଷାର ଗ୍ୟାରେଣ୍ଟି ପ୍ରଦାନ କରିବ, ଏଥିରେ ସନ୍ଦେହ ନାହିଁ।ଆଇନଜୀବୀଙ୍କ ସହାୟତା ରାଶି ବୃଦ୍ଧି । ଆଇନଜୀବୀଙ୍କ ସହାୟତା ରାଶି ବୃଦ୍ଧି କଲେ ମୁଖ୍ୟମନ୍ତ୍ରୀ । ଅବସର ନେଇଥିବା କିମ୍ବା ଦେହାନ୍ତ ହେବା କ୍ଷେତ୍ରରେ ସହାୟତା ରାଶିରେ ୪୦ ପ୍ରତିଶତ ବୃଦ୍ଧି । ରାଜ୍ୟରେ କାର୍ଯ୍ୟରତ ଆଇନଜୀବୀ ମାନଙ୍କ ସହାୟତା ପାଇଁ ଥିବା ରାଜ୍ୟ କଲ୍ୟାଣ ପାଣ୍ଠିରୁ ଆଇନଜୀବୀ ମାନଙ୍କୁ ଅବସର କିମ୍ବା ଦେହାନ୍ତ କ୍ଷେତ୍ରରେ ତାଙ୍କ ପରିବାରକୁ ସହାୟତା ପ୍ରଦାନ କରାଯାଉଛି । ଏହାଦ୍ବାରା ରାଜ୍ୟର ବିଭିନ୍ନ କୋର୍ଟରେ କାର୍ଯ୍ୟରତ ହଜାର ହଜାର ଆଇନଜୀବୀ ମାନେ ଉପକୃତ ହୋଇପାରିବେ ।
ଶେଷଥର ପାଇଁ ଆଇନଜୀବୀ ମାନଙ୍କର ଏହି ସହାୟତା ରାଶି ୨୦୨୧ ମସିହାରେ ବୃଦ୍ଧି ପାଇଥିଲା । ତେଣୁ ନୂଆ ସରକାରଙ୍କ ଏହି ସହାୟତା ରାଶି ବୃଦ୍ଧିଦ୍ବାରା ୫ ବର୍ଷ ବା ଏଥିରୁ କମ୍ ସମୟ ପାଇଁ କାର୍ଯ୍ୟରତ ଆଇନଜୀବୀଙ୍କୁ କେବଳ ଦେହାନ୍ତ କ୍ଷେତ୍ରରେ ପରିବାରର ନିକଟତମ ଆତ୍ମୀୟଙ୍କୁ ଏକ ଲକ୍ଷ ୫ ହଜାର ଟଙ୍କା ସହାୟତା ଦିଆଯିବା ଏକ ଉତ୍ତମ ପଦକ୍ଷେପ । ଏହାପରେ ପ୍ରତ୍ୟେକ ଅଧିକ ବର୍ଷର ଅଭିଜ୍ଞତା ପାଇଁ ସହାୟତା ରାଶି ପରିମାଣ ବୃଦ୍ଧି ପାଇବ । ଅବସର ଓ ଦେହାନ୍ତ କ୍ଷେତ୍ରରେ ଏହି ସହାୟତା ମିଳିବ । ୩୦ ବର୍ଷ କାର୍ଯ୍ୟରତ ଥିଲେ, ଅବସର କ୍ଷେତ୍ରରେ ସମ୍ପୃକ୍ତ ଆଇନଜୀବୀଙ୍କୁ କିମ୍ବା ଦେହାନ୍ତ କ୍ଷେତ୍ରରେ ତାଙ୍କ ପରିବାରର ନିକଟତମ ଆତ୍ମୀୟଙ୍କୁ ୬ଲକ୍ଷ ୩୦ ହଜାର ଟଙ୍କା ସହାୟତା ପ୍ରଦାନ କରାଯିବା ନିଶ୍ଚିତ ଭାବେ ଏହି ପରିବାର ପାଇଁ ଉପକାରରେ ଆସିବ ।
