ବିଧାୟକଙ୍କୁ ଉପରାଷ୍ଟ୍ରପତିଙ୍କ ଗୁରୁମନ୍ତ୍ର । ଲୋକଙ୍କ ସେବାରେ ହିଁ ମିଳିବ ସମ୍ମାନ । ବିଧାୟକଙ୍କ ପ୍ରଶିକ୍ଷଣ କାର୍ଯ୍ୟକ୍ରମରେ ଗଣତନ୍ତ୍ର, ବିଧାନସଭାର ମର୍ଯ୍ୟାଦା ଓ ବିକଶିତ ଓଡ଼ିଶା ଉପରେ ଗୁରୁତ୍ୱ ଦେଇଛନ୍ତି ଉପରାଷ୍ଟ୍ରପତି ସି.ପି. ରାଧାକ୍ରିଷ୍ଣନ। ଭୁବନେଶ୍ୱରରେ ବିଧାୟକଙ୍କୁ ଗଣତନ୍ତ୍ର ଓ ଜନସେବାର ପାଠ ପଢ଼ାଇଲେ ଉପରାଷ୍ଟ୍ରପତି ସି.ପି. ରାଧାକ୍ରିଷ୍ଣନ। ସପ୍ତଦଶ ଓଡ଼ିଶା ବିଧାନସଭାର ସଦସ୍ୟମାନଙ୍କ ପାଇଁ ଆୟୋଜିତ ପ୍ରଶିକ୍ଷଣ ଓ ଦିଗଦର୍ଶନ କାର୍ଯ୍ୟକ୍ରମରେ ଯୋଗଦେଇ ନିର୍ବାଚିତ ଜନପ୍ରତିନିଧିଙ୍କ ଦାୟିତ୍ୱ, ବିଧାନସଭାର ଶୃଙ୍ଖଳା ଏବଂ ସାମ୍ବିଧାନିକ ମୂଲ୍ୟବୋଧ ଉପରେ ଗୁରୁତ୍ୱ ଦେଇଛନ୍ତି ଉପରାଷ୍ଟ୍ରପତି। ଏହି କାର୍ଯ୍ୟକ୍ରମରେ ରାଜ୍ୟପାଳ ବ୍ରଜମୋହନ ରାମ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବାଚସ୍ପତି ସୁରମା ପାଢ଼ୀ ଓ ଉପବାଚସ୍ପତି ଭବାନୀ ଶଙ୍କର ଭୋଇ ଉପସ୍ଥିତ ଥିଲେ।
ନିର୍ବାଚନରେ ଭୋଟ୍ ପାଇଁ ବିଜୟ ମିଳିଥାଏ, କିନ୍ତୁ ଲୋକଙ୍କ ସେବା କଲେ ହିଁ ସେମାନଙ୍କ ସମ୍ମାନ ଅର୍ଜନ କରିହୁଏ। ବିଧାନସଭା କେବଳ ତର୍କବିତର୍କର ସ୍ଥାନ ନୁହେଁ। ଏଠାରେ ଉଠୁଥିବା ପ୍ରତ୍ୟେକ ପ୍ରଶ୍ନ, ପ୍ରଣୟନ ହେଉଥିବା ପ୍ରତ୍ୟେକ ଆଇନ ଓ ନିଆଯାଉଥିବା ପ୍ରତ୍ୟେକ ନୀତିଗତ ନିଷ୍ପତ୍ତି ସାଧାରଣ ଲୋକଙ୍କ ଜୀବନରେ ପରିବର୍ତ୍ତନ ଆଣିପାରେ ବୋଲି କହିଛନ୍ତି ଉପ ରାଷ୍ଟ୍ରପତି । ଗଣତନ୍ତ୍ରରେ ମତଭେଦ ସ୍ୱାଭାବିକ। କିନ୍ତୁ ମତଭେଦ ଯେପରି ଗୃହର କାର୍ଯ୍ୟକୁ ଅଚଳ କରିନଦିଏ, ସେଥିପ୍ରତି ସଚେତନ ରହିବାକୁ ସେ ପରାମର୍ଶ ଦେଇଛନ୍ତି। ଆଲୋଚନା, ବିତର୍କ ଓ ମତଭେଦର ଶେଷ ଲକ୍ଷ୍ୟ ହେବା ଉଚିତ ନିଷ୍ପତ୍ତି ଗ୍ରହଣ ଓ ଜନକଲ୍ୟାଣ।
ସମସ୍ତଙ୍କ ମତ ଭିନ୍ନ ହୋଇପାରେ, ମାତ୍ର ସମ୍ବିଧାନ ଓ ଜନସାଧାରଣଙ୍କ ପ୍ରତି ପ୍ରତିବଦ୍ଧତା ସମାନ ରହିବା ଆବଶ୍ୟକ ବୋଲି ସେ କହିଛନ୍ତି। ଉପରାଷ୍ଟ୍ରପତି ତାଙ୍କ ଅଭିଭାଷଣରେ ବିକଶିତ ଓଡ଼ିଶା ୨୦୩୬ ଏବଂ ବିକଶିତ ଭାରତ ୨୦୪୭ର ଲକ୍ଷ୍ୟ ସମ୍ପର୍କରେ ଆଲୋକପାତ କରିଛନ୍ତି। ୨୦୩୬ରେ ଓଡ଼ିଶା ପ୍ରଦେଶ ଗଠନର ଶତବାର୍ଷିକୀ ପାଳନ କରିବ। ଏହି ଐତିହାସିକ ସମୟକୁ ଦୃଷ୍ଟିରେ ରଖି ରାଜ୍ୟର ସାମଗ୍ରିକ ବିକାଶ, ଯୁବପିଢ଼ିଙ୍କ ପାଇଁ ସୁଯୋଗ ସୃଷ୍ଟି ଏବଂ ପ୍ରତ୍ୟେକ ଗାଁ ଓ ପରିବାର ପାଖରେ ବିକାଶର ସୁଫଳ ପହଞ୍ଚାଇବାକୁ ସେ ଆହ୍ୱାନ ଦେଇଛନ୍ତି।
ସେହିପରି ବିଧାୟକମାନେ ପ୍ରଶ୍ନକାଳ, ଶୂନ୍ୟକାଳ, ବଜେଟ୍ ପ୍ରକ୍ରିୟା, ବିଧାନସଭା କମିଟି ଓ ଗୃହ ପରିଚାଳନା ନିୟମ ସମ୍ପର୍କରେ ଭଲଭାବେ ଅବଗତ ହେବା ଆବଶ୍ୟକ ବୋଲି କହିବା ସହ ବିଧାନସଭା କାର୍ଯ୍ୟରେ ଆଧୁନିକ ପ୍ରଯୁକ୍ତିବିଦ୍ୟା, ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଏବଂ ଡିଜିଟାଲ୍ ବ୍ୟବସ୍ଥାର ବ୍ୟବହାରକୁ ମଧ୍ୟ ସେ ଗୁରୁତ୍ୱ ଦେଇଛନ୍ତି। ଏହି ପ୍ରଶିକ୍ଷଣ କାର୍ଯ୍ୟକ୍ରମକୁ ବିରୋଧୀ ବିଜେଡି ଓ କଂଗ୍ରେସର ବିଧାୟକମାନେ ବର୍ଜନ କରିଥିବା ରିପୋର୍ଟରେ ପ୍ରକାଶ ପାଇଛି। ଉପରାଷ୍ଟ୍ରପତି ଗୃହରେ ମତଭେଦ ଓ ଗଠନମୂଳକ ଆଲୋଚନା ଉପରେ ଗୁରୁତ୍ୱ ଦେଇଥିବା ବେଳେ ବିରୋଧୀ ଦଳଙ୍କ ଅନୁପସ୍ଥିତି ମଧ୍ୟ ଏହି କାର୍ଯ୍ୟକ୍ରମର ଏକ ଉଲ୍ଲେଖନୀୟ ଘଟଣା ହୋଇଛି।
ତେବେ ବର୍ଜନର ନିର୍ଦ୍ଦିଷ୍ଟ କାରଣ ସମ୍ପର୍କରେ ସ୍ପଷ୍ଟ ତଥ୍ୟ ମିଳିନାହିଁ। କାର୍ଯ୍ୟକ୍ରମକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ରାଜ୍ୟପାଳ ବ୍ରଜମୋହନ ରାମ ଓ ବାଚସ୍ପତି ସୁରମା ପାଢ଼ୀ ମଧ୍ୟ ସମ୍ବୋଧନ କରିଛନ୍ତି। ବିଧାୟକମାନଙ୍କୁ ବିଧାନସଭାର କାର୍ଯ୍ୟପ୍ରଣାଳୀ, ନିୟମ ଓ ବିଧାନ ପ୍ରକ୍ରିୟା ସମ୍ପର୍କରେ ଅବଗତ କରାଇବା ଏହି ପ୍ରଶିକ୍ଷଣର ମୁଖ୍ୟ ଉଦ୍ଦେଶ୍ୟ। ନଭେମ୍ବର ୧୮ରୁ ସପ୍ତଦଶ ବିଧାନସଭାର ଅଷ୍ଟମ ଅଧିବେଶନ ଆରମ୍ଭ ହେବାକୁ ଥିବା ବେଳେ ଏହି କାର୍ଯ୍ୟକ୍ରମର ଗୁରୁତ୍ୱ ରହିଛି।
