କେଉଁଠି ମିଳିଲା ସଫଳତା, କେଉଁଠି ବାକି ରହିଲା ଆଶା?

ଓଡ଼ିଶାରେ ପ୍ରଥମ ଥର ପାଇଁ ପୂର୍ଣ୍ଣ ବହୁମତ ସହ କ୍ଷମତାକୁ ଆସିଥିବା ବିଜେପି ସରକାର ନିଜର ଦୁଇ ବର୍ଷ କାର୍ଯ୍ୟକାଳ ପୂରଣ କରିଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ଚାଲିଥିବା ଏହି “ଡବଲ ଇଞ୍ଜିନ” ସରକାର ରାଜ୍ୟରେ ପରିବର୍ତ୍ତନର ନୂଆ ନାରା ଦେଇଥିବା ବେଳେ, ଏହି ଦୁଇ ବର୍ଷର ଯାତ୍ରାରେ ଅନେକ ଉଥାନ-ପତନ ଦେଖିବାକୁ ମିଳିଛି। ସରକାର ଗଠନର ପ୍ରଥମ ଦିନରୁ ହିଁ ଶ୍ରୀମନ୍ଦିରର ଚାରିଦ୍ୱାର ଖୋଲିବା ଏବଂ ବହୁ ବର୍ଷର ଅପେକ୍ଷା ପରେ ରତ୍ନଭଣ୍ଡାରର ଗଣତି-ମଣତି ପ୍ରକ୍ରିୟା ଆରମ୍ଭ କରିବା ମୋହନ ସରକାରଙ୍କ ପାଇଁ ଏକ ବଡ଼ ସଫଳତା। ଏହା ଆଧ୍ୟାତ୍ମିକ ସ୍ତରରେ ଓଡ଼ିଆ ଅସ୍ମିତାକୁ ସୁଦୃଢ଼ କରିଛି। ରାଜ୍ୟର ମହିଳାମାନଙ୍କୁ ଆର୍ଥିକ ସହାୟତା ପ୍ରଦାନ ପାଇଁ ଆରମ୍ଭ ହୋଇଥିବା ‘ସୁଭଦ୍ରା ଯୋଜନା’ ସରକାରଙ୍କ ଏକ ମାଷ୍ଟରଷ୍ଟ୍ରୋକ୍ ଭାବେ ଉଭା ହୋଇଛି। କୋଟି କୋଟି ମହିଳାଙ୍କ ବ୍ୟାଙ୍କ ଖାତାକୁ ସିଧାସଳଖ ଟଙ୍କା ପଠାଇ ସରକାର ତୃଣମୂଳ ସ୍ତରରେ ନିଜର ପତିଆରା ବଢ଼ାଇଛନ୍ତି। ଚାଷୀଙ୍କୁ ଦେଇଥିବା ପ୍ରତିଶ୍ରୁତି ମୁତାବକ ଧାନର କ୍ୱିଣ୍ଟାଲ ପିଛା ମୂଲ୍ୟ ୩୧୦୦ ଟଙ୍କାକୁ ବୃଦ୍ଧି କରି ସରକାର ଚାଷୀକୂଳର ବିଶ୍ୱାସଭାଜନ ହୋଇପାରିଛନ୍ତି। ଆୟୁଷ୍ମାନ ଭାରତ ଓ ପିଏମ୍ କିଷାନ ପରି କେନ୍ଦ୍ରୀୟ ଯୋଜନାକୁ ରାଜ୍ୟରେ କାର୍ଯ୍ୟକାରୀ କରି ସାଧାରଣ ଲୋକଙ୍କୁ ସିଧାସଳଖ ଫାଇଦା ପହଞ୍ଚାଇବାରେ ସରକାର ସଫଳ ହୋଇଛନ୍ତି।

କିନ୍ତୁ ଗତ ଦୁଇ ବର୍ଷ ମଧ୍ୟରେ ରାଜ୍ୟର ବିଭିନ୍ନ ସ୍ଥାନରେ ଘଟିଥିବା ସାମ୍ପ୍ରଦାୟିକ ଉତ୍ତେଜନା ଏବଂ ମହିଳାଙ୍କ ବିରୋଧରେ ବଢ଼ୁଥିବା ଅପରାଧ ସରକାରଙ୍କ ପାଇଁ ଚିନ୍ତାର ବିଷୟ ପାଲଟିଛି। ବିରୋଧୀ ଦଳଗୁଡ଼ିକ ଏହାକୁ ନେଇ ବାରମ୍ବାର ସରକାରଙ୍କୁ ଘେରିଛନ୍ତି। ନିର୍ବାଚନ ପୂର୍ବରୁ ବ୍ୟାପକ ନିଯୁକ୍ତିର ପ୍ରତିଶ୍ରୁତି ଦିଆଯାଇଥିଲେ ହେଁ, ଶିଳ୍ପାୟନ କ୍ଷେତ୍ରରେ କୌଣସି ବଡ଼ ଧରଣର ବିଦେଶୀ ପୁଞ୍ଜିନିବେଶ ଓ ନୂତନ କର୍ମସଂସ୍ଥାନ ସୃଷ୍ଟି ହେବା ନେଇ ଆଶାଜନକ ସଫଳତା ମିଳିନାହିଁ। ଅମଲାତନ୍ତ୍ର କିମ୍ବା “ବାବୁରାଜ” ଶେଷ କରିବାକୁ ନାରା ଦେଇଥିବା ସରକାର ଏବେ ମଧ୍ୟ ଅଫିସରମାନଙ୍କ ଉପରେ ସମ୍ପୂର୍ଣ୍ଣ ନିୟନ୍ତ୍ରଣ ରଖିବାରେ ସଂଘର୍ଷ କରୁଥିବା ଦେଖାଯାଉଛି। ଅନେକ ସ୍ଥାନରେ ସରକାରୀ ଯୋଜନା ପହଞ୍ଚିବାରେ ମନ୍ଥରତା ପରିଲକ୍ଷିତ ହେଉଛି। କୋଟିଆ ଓ ପଡ଼ୋଶୀ ରାଜ୍ୟ ସହ ସୀମା ବିବାଦର ସ୍ଥାୟୀ ସମାଧାନ ଏବଂ ନିକଟରେ ଘଟିଥିବା କିଛି ପ୍ରାକୃତିକ ବିପର୍ଯ୍ୟୟ ସମୟରେ ରିଲିଫ୍ ବଣ୍ଟନକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।

ଏହାରି ଭିତରେ ଓଡ଼ିଶା ଆସିପାରନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ମୋହନ ସରକାରଙ୍କ ଦୁଇ ବର୍ଷ ପୂର୍ତ୍ତି ଅବସରରେ ଓଡ଼ିଶା ଆସିପାରନ୍ତି ପ୍ରଧାନମନ୍ତ୍ରୀ । ଜୁନ୍ ୧୨ ତାରିଖରେ ରାଜ୍ୟ ସରକାରଙ୍କୁ ୨ ବର୍ଷ ପୂର୍ତ୍ତି ହେଉଛି । ଦୁଇ ବର୍ଷ ପୂର୍ତ୍ତି ନେଇ ମନ୍ତ୍ରୀ ମାନଙ୍କ ସହିତ ମୁଖ୍ୟମନ୍ତ୍ରୀଙ୍କ ଆଲୋଚନା କରୁଛନ୍ତି । ରାଜ୍ୟବାସୀଙ୍କ ଆଗରେ ଏହି ରିପୋର୍ଟ କାର୍ଡ ଉପସ୍ଥାପନ କରିବେ ସରକାର । ପ୍ରଥମ ବର୍ଷ ପୂର୍ତ୍ତି କାର୍ଯ୍ୟକ୍ରମରେ ଯୋଗ ଦେଇ ରାଜ୍ୟ ସରକାରଙ୍କ ରିପୋର୍ଟ କାର୍ଡ ଓଡ଼ିଶାବାସୀଙ୍କ ଆଗରେ ରଖିଥିଲେ ପ୍ରଧାନମନ୍ତ୍ରୀ । ଦ୍ବିତୀୟ ବର୍ଷର ଉପଲବ୍ଧି ମଧ୍ୟ ଲୋକଙ୍କ ପାଖରେ ରଖିବେ ରାଜ୍ୟ ସରକାର । କଣ ସରକାର ଉତ୍ତର ରଖିବେ ତାକୁ ଅପେକ୍ଷା ।