କବି ଭକ୍ତଚରଣ ଦାସଙ୍କ ସ୍ମୁତି ଉପଲକ୍ଷେ ସାରସ୍ୱତ ସଭା

ଖୋର୍ଦ୍ଧା ଜିଲ୍ଲା ବୋଲଗଡ ବ୍ଳକ ଅନ୍ତର୍ଗତ କବିତୀର୍ଥ ସାନପଦର ଗ୍ରାମରେ ଓଡିଶା ସାହିତ୍ୟ ଏକାଡେମୀ ଓ ଭକ୍ତଚରଣ ସାହିତ୍ୟ ସଂସ୍କୃତି ପରିଷଦ ମିଳିତ ଆନୁକୂଲ୍ୟରେ ବୈଷ୍ଣବ କବି ଭକ୍ତଚରଣ ଦାସଙ୍କ ସ୍ମୁତି ଉପଲକ୍ଷେ ଏକ ସାରସ୍ୱତ ସଭା ଶ୍ରୀକାନ୍ତ କୁମାର ନାୟକଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି। ଦୈନିକ ସୁବାର୍ତ୍ତାର ସମ୍ପାଦକ ପ୍ରଦ୍ୟୁମ୍ନ ଶତପଥୀ ମୁଖ୍ୟଅତିଥି ଭାବରେ ଯୋଗଦେଇ କହିଲେ ଯେ, ସମଗ୍ର ଓଡ଼ିଶାର ଚାଟଶାଳୀରେ ଭକ୍ତଚରଣଙ୍କ ମଥୁରାମଙ୍ଗଳ, ମନବୋଧ ଚଉତିଶା ଓ କଳାକଳେବର ଚଉତିଶା ସହିତ ସେଇ ମାଟିର କବି ଦନେଇ ଦାସଙ୍କ ଗୋପୀଭାଷା ଅବଧାନମାନଙ୍କ ଦ୍ୱାରା ପଢ଼ାଯାଉଥିଲା ; ପୁନଶ୍ଚ ପିଣ୍ଡିକ ଶ୍ରୀଚନ୍ଦନଙ୍କ ବସନ୍ତ ରାସ ଓଡିଶାରେ ବସନ୍ତ ଋତୁରେ ଅଭିନୀତ ହେଉଥିଲା ; ତେଣୁ ଶୁଦ୍ଧ ଓଡ଼ିଆ ଭାଷା ଖୋର୍ଦ୍ଧାର ଏଇ ମାଟିହିଁ ସମଗ୍ର ଓଡିଶାକୁ ଶିକ୍ଷା ଦେଉଥିଲା। ମୁଖ୍ୟବକ୍ତା ଭାବରେ ଡକ୍ଟର ରମେଶ ଚନ୍ଦ୍ର ମଲ୍ଲିକ କହିଲେ ଯେ, ମଥୁରାମଙ୍ଗଳରେ ପ୍ରେମର ପରିଭାଷା ଅତ୍ୟନ୍ତ ନିର୍ମଳ। ତତସହିତ କୃଷ୍ଣ ବଳରାମଙ୍କ ବୀରତ୍ୱ ସମାଜକୁ ସୁରକ୍ଷା ଦେବା ସହିତ କବି ଭକ୍ତଚରଣଙ୍କ ରଚନା ଚରିତ୍ର ଗଠନ ପାଇଁ ବାର୍ତ୍ତା ପ୍ରଦାନ କରେ।
ସମ୍ମାନିତ ବକ୍ତା ଭାବରେ ଡ଼କ୍ଟର ବୈରାଗୀ ଚରଣ ପଟ୍ଟନାୟକ ଯୋଗଦେଇ ରାଧାକୃଷ୍ଣ ପ୍ରେମଲୀଳାର ନିଚ୍ଛକ ବାସ୍ତବତା ସହ ଛାନ୍ଦରେ ବିଭିନ୍ନ ରସର ପ୍ରୟୋଗ ମଥୁରାମଙ୍ଗଳରେ ସରଳ ସାବଲୀଳ ଭାଷାରେ ବର୍ଣ୍ଣିତ ହେବା ସହ ମନବୋଧ ଚଉତିଶାକୁ ଯଥାର୍ଥରେ ଓଡ଼ିଆ ଭାଷାର ମୋହମୁଦ୍ଗର ବୋଲି ବର୍ଣ୍ଣନା କରିଥିଲେ। ସାନପଦର ମାଟିର ସଂସ୍କୃତି ଗବେଷକ ଅନ୍ୟତମ ବକ୍ତା ଭାବରେ ଯୋଗଦେଇ ରାଜକିଶୋର ବ୍ରହ୍ମା ଏଇ ଗ୍ରାମରେ ଜନ୍ମଗ୍ରହଣ କରିଥିବା ସମସାମୟିକ ୫ ଜଣ କବିଙ୍କ ରଚନା ବିଷୟରେ ସୂଚନା ଦେଇଥିଲେ। ସମ୍ମାନିତ ଅତିଥି ଭାବରେ ଭକ୍ତଚରଣ ବିଦ୍ୟାପୀଠର ଶିକ୍ଷକ ବିଜୟ କୁମାର ସାହୁ, ସରପଞ୍ଚ ବୈକୁଣ୍ଠ ଚରଣ ସ୍ୱାଇଁ, ସମିତି ସଭ୍ୟ ଦିଲ୍ଲୀପ କୁମାର ମହାପାତ୍ର, ଗ୍ରାମ ସଭାପତି ସୁରେଶ ଚନ୍ଦ୍ର ମହାପାତ୍ର, ଗ୍ରାମ କମିଟି ସମ୍ପାଦକ ଅର୍ଜୁନ ପଟ୍ଟନାୟକ ପ୍ରମୁଖ ଯୋଗଦେଇଥିଲେ।
ଓଡିଶା ସାହିତ୍ୟ ଏକାଡେମୀର ସହସଚିବ ସଞ୍ଜୟ କୁମାର ଛୁଆଳସିଂହ ସମସ୍ତ ଅତିଥିଙ୍କୁ ସ୍ୱାଗତ ଅଭିଭାଷଣ ପ୍ରଦାନ କରିଥିଲେ। ଭକ୍ତଚରଣ ସାହିତ୍ୟ ସଂସ୍କୃତି ପରିଷଦର ସମ୍ପାଦକ ବିକ୍ରମ କେଶରୀ ସାମନ୍ତରାୟ ଧନ୍ୟବାଦ ଯୋଗଦେଇଥିଲେ।