ବିଗତ ଦିନରେ ଦିଲ୍ଲୀରେ ଉଚ୍ଚଶିକ୍ଷିତ ତଥା ସରକାରୀ ବୃତ୍ତିଧାରୀ ଡାକ୍ତରୀ ଦଳର ଆତଙ୍କବାଦୀ ମଡ୍ୟୁଲ୍ ଦେଶ ଦେଖିଛି । ବୋମା ବିସ୍ଫୋରଣ ମନେପକାଇ ଦେଇଛି ଏହାର ରୂପ । ଡାକ୍ତରଙ୍କ ସଂପୃକ୍ତି ଘଟଣା ସାରା ବିଶ୍ୱରେ ବିସ୍ମୟ ସୃଷ୍ଟି କରିଛି। ଆତଙ୍କବାଦର ପାରମ୍ପରିକ ରୂପ ବଦଳିବାରେ ଲାଗିଛି । ବର୍ତ୍ତମାନ ଆକ୍ରମଣର ଷଡ୍ଯନ୍ତ୍ର ଆଉ ଦୁର୍ଗମ ଅଞ୍ଚଳରେ ହେଉନାହିଁ । ସହରରେ ଏସି ରୁମରେ ରହୁଥିବା ଉଚ୍ଚ ବେତନଯୁକ୍ତ ବୃତ୍ତିରେ ନିଯୁକ୍ତ ବ୍ୟକ୍ତିବିଶେଷଙ୍କ ଦ୍ୱାରା ହେଉଛି। ପରିବର୍ତ୍ତନର ମୁଖ୍ୟ କାରଣ ହେଉଛି ଇଣ୍ଟରନେଟ୍ ଏବଂ ଉନ୍ନତ ପ୍ରଯୁକ୍ତିବିଦ୍ୟା । ‘ସିଗନାଲ’ ଭଳି ବ୍ୟକ୍ତିଗତ ଗୋପନୀୟତାକୁ ପ୍ରାଧାନ୍ୟ ଦେଉଥିବା ଆପ୍ଗୁଡ଼ିକର ବ୍ୟବହାର କରି ଚକ୍ରାନ୍ତକାରୀମାନେ ଭୟ ନ କରି ସନ୍ଦେହରୁ ଉର୍ଦ୍ଧ୍ୱରେ ରହି ବିସ୍ଫୋରଣ ରୂପରେଖ ପ୍ରସ୍ତୁତ କରୁଛନ୍ତି। ୱେବସାଇଟ୍ଗୁଡ଼ିକରେ ସହଜଲଭ୍ୟ ଦ୍ରବ୍ୟରୁ ଉଚ୍ଚ କ୍ଷମତାସମ୍ପନ୍ନ ବୋମା ବା ‘ରାଇସିନ’ ଭଳି ପ୍ରାଣଘାତୀ ବିଷ ପ୍ରସ୍ତୁତ କରାଯାଇପାରୁଛି । ‘ଇ-କମର୍ସ’ ମଞ୍ଚଗୁଡ଼ିକ ମାଧ୍ୟମରେ ସହଜରେ ଏହିସବୁ ଦ୍ରବ୍ୟ ମଗାଇ ବୋମା ତିଆର କରାଯାଇପାରୁଛି । ଇଣ୍ଟରନେଟ୍ ମାଧ୍ୟମରେ ଘୃଣା ସୃଷ୍ଟି ପ୍ରକ୍ରିୟା ଏତେ ବ୍ୟାପକ ଯେ ଜଣେ ସାଧାରଣ ବ୍ୟକ୍ତି କେବଳ ଏକ ଉଗ୍ର ଚିତ୍ର ବା ଭିଡିଓ ଦେଖି କିଛି ଦିନ ମଧ୍ୟରେ ଜଣେ ଉଗ୍ରପନ୍ଥୀ ହୋଇପାରେ। କିଛି ଲୋକ ବ୍ରେନ ଓ୍ବାସ କରି ଏଥିରେ ପୃଥିବୀକୁ କେବଳ ‘ଭଲ-ମନ୍ଦ’ ରୂପେ ଦେଖାଇ ଏହାର ବିଲୋପନ ଜରୁରୀ ବୋଲି ହୃଦ୍ବୋଧ କରାଇ ଦିଆଯାଏ।
ଆତଙ୍କବାଦୀମାନେ ଏବେ ଗୁପ୍ତ ‘କମ୍ୟୁନିଟି’ ବା ଗୋଷ୍ଠୀ ଗଢ଼ି ଏକ ବିଶାଳ ନେଟୱାର୍କର ଅଂଶବିଶେଷ ଭାବରେ ସମନ୍ୱୟ ରକ୍ଷା କରି କାର୍ଯ୍ୟ କରନ୍ତି। ଏହା ସହିତ ଡ୍ରୋନ୍ ବ୍ୟବହାର କରି ଲୋକଙ୍କ ଜୀବନ ନେବା ପାଇଁ ସହଜ ପନ୍ଥା ଅନୁସରଣ କରୁଛନ୍ତି । ସବୁ କିଛି ରିମୋର୍ଟ କଣ୍ଟ୍ରୋଲରେ ହୋଇପାରୁଛି ।
ବୈଷୟିକ ଜ୍ଞାନ ଏହି ବିପଜ୍ଜନକ ସ୍ଥିତିର ମୁକାବିଲା ପାଇଁ ଆଇନ ଏବଂ ଟେକ୍ କମ୍ପାନୀଗୁଡ଼ିକର ଉଦ୍ୟମ ବିଶେଷ ଫଳପ୍ରଦ ହେଉ ନାହିଁ, ଯାହା ଏକବିଂଶ ଶତାବ୍ଦୀ ପାଇଁ ଦାରୁଣ ଦୁର୍ଭାଗ୍ୟର ବିଷୟ।
