ହାତ ଗୋଡ କାଟିଦିଅ ତେବେ ହିଁ ଲୋକେ ଆଇନର ପାଳନ କରିବେ। ଆମର ଏକ ଗଣତନ୍ତ୍ର ଅଛି, ତେଣୁ ସମସ୍ତେ ଦଣ୍ଡ ବିଧାନକୁ ହାଲୁକା ଭାବରେ ନିଅନ୍ତି। କର୍ଣ୍ଣାଟକ ହାଇକୋର୍ଟର ବିଚାରପତି ଆର୍ ନଟରାଜ୍ ଏକ ମାମଲାର ଶୁଣାଣି ସମୟରେ ମୌଖିକ ଭାବରେ ଏହି ବିବାଦୀୟ ମନ୍ତବ୍ୟ ଦେଇଛନ୍ତି । ଏହି ମନ୍ତବ୍ୟ ସହିତ, ହାଇକୋର୍ଟ ଜଣେ ୨୩ ବର୍ଷୀୟ ଇଞ୍ଜିନିୟରିଂ ଛାତ୍ରଙ୍କୁ ଜାମିନ ଦେବାକୁ ମନା କରିଦେଇଛନ୍ତି। ଛାତ୍ରଙ୍କ ଜାମିନ ଆବେଦନର ଶୁଣାଣି କରି ବିଚାରପତି କହିଛନ୍ତି ଯେ, ଆଇନ ଏବେ ଦନ୍ତହୀନ ହୋଇଯାଇଛି। କାରଣ ଆମେ ଅପରାଧୀଙ୍କ ସହିତ କଠୋର ଭାବରେ ବ୍ୟବହାର କରୁନାହୁଁ। କଠୋର ଆଇନ ବ୍ୟବସ୍ଥା ଯୋଗୁ ମଧ୍ୟପ୍ରାଚ୍ୟରେ ଅପରାଧ କରିବା ସହଜ ନୁହେଁ। ଆମ ଦେଶରେ ଲୋକମାନେ ବିଭିନ୍ନ ଅପରାଧ କରୁଛନ୍ତି, ଏପରିକି ନିୟମିତ ଭାବରେ ମଧ୍ୟ, କାରଣ ଅପରାଧୀମାନଙ୍କ ସହିତ ଆଇନ ଅନୁଯାୟୀ କଠୋର କାର୍ଯ୍ୟାନୁଷ୍ଠାନ ନିଆଯାଉ ନାହିଁ। ସେଥିପାଇଁ ଅପରାଧ ସାଧାରଣ ହୋଇଯାଇଛି।
ବିଚାରପତି କହିଛନ୍ତି, ଯଦି ତୁମେ ଲୁଣ ଖାଇଛ, ତେବେ ତୁମକୁ ପାଣି ପିଇବାକୁ ପଡିବ। ତାଙ୍କୁ ଆଉ ଚାରି ପାଞ୍ଚ ଦିନ ରହିବାକୁ ଦିଅ। ତାଙ୍କୁ ଜେଲ୍ରେ ଅଭ୍ୟସ୍ତ ହେବାକୁ ଦିଅ। କିଏ ଜାଣେ, ଯଦି ସେ ଦୋଷୀ ସାବ୍ୟସ୍ତ ହୁଅନ୍ତି, ତେବେ ପୁଣି ଜେଲ୍କୁ ଯିବାକୁ ପଡ଼ିପାରେ। ଅଭିଯୁକ୍ତକୁ ଚଳିତ ବର୍ଷ ଏପ୍ରିଲ୍ ଆରମ୍ଭରେ ପୁଲିସ ଗିରଫ କରିଥିଲା। ସେବେଠାରୁ ସେ ନ୍ୟାୟିକ ହେପାଜତରେ ଅଛନ୍ତି। ତାଙ୍କ ବିରୋଧରେ ୨୦୨୩ ମସିହାରେ ଜଣେ ସହପାଠୀଙ୍କୁ ଯୌନ ନିର୍ଯାତନା ଦେବାର ଅଭିଯୋଗ ଅଛି। ପ୍ରତିରକ୍ଷା ପକ୍ଷ ଯୁକ୍ତି ଦର୍ଶାଇଥିଲେ ଯେ, ଛାତ୍ର ଜଣକ ଏପରି ଏକ ଅପରାଧ ପାଇଁ ପ୍ରାୟ ଦୁଇ ମାସ ଜେଲ୍ରେ ବିତାଇଛନ୍ତି। ଅଭିଯୁକ୍ତଙ୍କୁ ଅଟକ ରଖିବା ଦ୍ବାରା ତାଙ୍କ ବୃତ୍ତିଗତ ଭବିଷ୍ୟତ ଉପରେ ପ୍ରତିକୂଳ ପ୍ରଭାବ ପଡ଼ିପାରେ।
ହାଇକୋର୍ଟ ରାଜ୍ୟ ସରକାରଙ୍କୁ ନୋଟିସ୍ ଜାରି କରି ପରବର୍ତ୍ତୀ ଶୁଣାଣି ଜୁନ୍ ୮ ତାରିଖରେ ଧାର୍ଯ୍ୟ କରିଛନ୍ତି। ପୁଲିସ କହିଛି ଯେ ଅଭିଯୁକ୍ତ ଜଣକ ସହପାଠୀଙ୍କୁ ବନ୍ଧୁତ୍ୱପୂର୍ଣ୍ଣ ବ୍ୟବହାରକରି ପ୍ରଲୋଭନ ଦେଖାଇ ଏକ ଆପାର୍ଟମେଣ୍ଟକୁ ନେଇଯାଇଥିଲେ ଏବଂ ୧୨ ସେପ୍ଟେମ୍ବର ୨୦୨୩ ରେ ତାଙ୍କୁ ତାଙ୍କ ଇଚ୍ଛା ବିରୋଧରେ ଯୌନ ନିର୍ଯାତନା ଦେଇଥିଲେ ବୋଲି ଅଭିଯୋଗ ହୋଇଥିଲା। ପୁଲିସ ନିକଟରେ ଅଭିଯୋଗ ଦାଖଲ କରିବା ପୂର୍ବରୁ, ସହାପାଠୀ ଜଣକ ପ୍ରଥମେ ଜାତୀୟ ମହିଳା କମିସନଙ୍କ ସହ ଯୋଗାଯୋଗ କରିଥିଲେ।
