କେନ୍ଦ୍ରମନ୍ତ୍ରୀ ଓ ଆଇବିଏମର ଗ୍ଲୋବାଲ ସିଇଓଙ୍କ ମଧ୍ୟରେ ଭିସି ଜରିଆରେ ଆଲୋଚନା
ଭାରତରେ ଶିକ୍ଷା କ୍ଷେତ୍ରରେ ଟେକ୍ନୋଲୋଜିର ବ୍ୟବହାରକୁ ବଢାଇବା ଲକ୍ଷ୍ୟରେ ସୋମବାର କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ବିଶ୍ୱର ଅନ୍ୟତମ ପୁରୁଣା ଏବଂ ବୃହତ ଆଇଟି କମ୍ପାନୀ ଆଇବିଏମ(ଇଣ୍ଟରନ୍ୟାସନାଲ ବିଜନେସ ମେସିନ କର୍ପୋରେସନ)ର ଗ୍ଲୋବାଲ ସିଇଓ ତଥା ଚେୟାରମ୍ୟାନ ଶ୍ରୀ ଅରବିନ୍ଦ କ୍ରୀଷ୍ଣଙ୍କ ମଧ୍ୟରେ ଭିସି ଜରିଆରେ ଏକ ବୈଠକ ଅନୁଷ୍ଠିତ ହୋଇଯାଇଛି ।
ଏହି ବୈଠକ ମୁଖ୍ୟତଃ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟିକୁ ସାକାର କରିବା ଏବଂ ଆଇବିଏମ ସହଭାଗୀତାରେ ଭାରତର ଶିକ୍ଷା କ୍ଷେତ୍ରକୁ ଆଧୁନିକୀକରଣ କରିବା ଉପରେ କେନ୍ଦ୍ରୀଭୂତ ଥିଲା । ଭାରତରେ ଶିକ୍ଷା, ଗବେଷଣା ଓ ନବସୃଜନ କ୍ଷେତ୍ରରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) ଏବଂ କ୍ୱାଣ୍ଟମ୍ କମ୍ପ୍ୟୁଟିଂ ଭଳି ଅତ୍ୟାଧୁନିକ ପ୍ରଯୁକ୍ତିବିଦ୍ୟାକୁ କିପରି ସାମିଲ କରାଯାଇପାରିବ, ସେ ନେଇ ଏହି ଆଲୋଚନା କରାଯାଇଥିଲା । ବିଶେଷ ଭାବରେ ଦେଶରେ ଏଆଇ ଶିକ୍ଷାକୁ ସର୍ବବ୍ୟାପୀ କରିବା ତଥା କ୍ୱାଣ୍ଟମ୍ କମ୍ପ୍ୟୁଟିଂ ଭଳି ଗୁରୁତ୍ୱପୂର୍ଣ୍ଣ ପ୍ରଯୁକ୍ତି ପାଇଁ ଏକ ଦୃଢ଼ ଦକ୍ଷତା ସମ୍ପନ୍ନ ପ୍ରତିଭା ପ୍ରସ୍ତୁତ କରିବାର ଯେଉଁ ଦୂରଦୃଷ୍ଟି ରହିଛି, ତାହାକୁ ଆଗକୁ ବଢ଼ାଇବା ପାଇଁ ଆଇବିଏମ କିପରି ଶିକ୍ଷା ମନ୍ତ୍ରାଳୟ ସହ ସହଭାଗିତା କରିପାରିବ, ତାହା ଉପରେ ମଧ୍ୟ ବ୍ୟାପକ ଆଲୋଚନା ହୋଇଥିଲା ।
ଶିକ୍ଷା ମନ୍ତ୍ରଣାଳୟ ଏହି ବୈଷୟିକ ଜ୍ଞାନକୁ ଦେଶର ପ୍ରତ୍ୟେକ କୋଣ ଅନୁକୋଣ ତଥା ପ୍ରମୁଖ ଅନୁଷ୍ଠାନ ଠାରୁ ଆରମ୍ଭ କରି ଦୂରଦୁରାନ୍ତ ଅଞ୍ଚଳରେ ଥିବା କଲେଜ ପର୍ଯ୍ୟନ୍ତ ପହଞ୍ଚାଇବା ପାଇଁ ପ୍ରତିବଦ୍ଧ । ଏହି ପଦକ୍ଷେପ ଭାରତକୁ ବିଶ୍ୱସ୍ତରରେ ଏକ ବୈଷୟିକ କେନ୍ଦ୍ର ଭାବରେ ସୁଦୃଢ଼ କରିବା ସହ ଭାରତୀୟ ଯୁବକମାନଙ୍କ ପାଇଁ ଅସୀମ ସୁଯୋଗ ଓ ସମ୍ଭାବନା ତିଆରି କରିବ ।
ଏହି ବୈଠକରେ କନ୍ସୋଲେଟ୍ ଜେନେରାଲ ଅଫ୍ ଇଣ୍ଡିଆ ଆମ୍ବାସେଡର ବିନୟ ଶ୍ରୀକାନ୍ତ ପ୍ରଧାନ, ସ୍କୁଲ ଏବଂ ଉଚ୍ଚ ଶିକ୍ଷା ମନ୍ତ୍ରାଳୟର ସଚିବ, ଆଇଆଇଟି ଏବଂ ଆଇଆଇଏସସି, ବାଙ୍ଗାଲୋରର ନିର୍ଦ୍ଦେଶକଙ୍କ ସମେତ ଅନେକ ବରିଷ୍ଠ ଅଧିକାରୀ ଉପସ୍ଥିତ ଥିଲେ ।
ସୂଚନାଯୋଗ୍ୟ, ଆଇବିଏମ ଭଳି ବିଶ୍ୱସ୍ତରୀୟ ସଂସ୍ଥା, ଯାହାକି ବିଭିନ୍ନ ପ୍ରକାରର କମ୍ପ୍ୟୁଟର, ସଫ୍ଟୱେର୍, କ୍ଲାଉଡ୍ କମ୍ପ୍ୟୁଟିଂ ଏବଂ ଏଆଇ କ୍ଷେତ୍ରରେ ସୁନାମ ଅର୍ଜନ କରିଛି, ତାହାର ସହଭାଗିତା ଦ୍ୱାରା ଭାରତୀୟ ଶିକ୍ଷା ବ୍ୟବସ୍ଥାରେ ଏକ ବଡ଼ ପରିବର୍ତ୍ତନ ଆସିବ । ଖୁବ୍ ଶୀଘ୍ର ଏହି ସହଭାଗୀତାକୁ ଆଗକୁ ବଢ଼ାଇବା ଦିଗରେ ପଦକ୍ଷେପ ନିଆଯିବ ବୋଲି ସୂଚନା ମିଳିଛି ।
