କିଟ୍ ବିଶ୍ୱବିଦ୍ୟାଳୟ ହଷ୍ଟେଲରୁ ଜଣେ ପ୍ରଥମ ବର୍ଷ ଛାତ୍ରଙ୍କ ଝୁଲନ୍ତା ମୃତଦେହ ଉଦ୍ଧାରକୁ ନେଇ ରାଜନୀତି ସରଗରମ ହୋଇଛି । ଏହା କିଟ୍ କ୍ୟାମ୍ପସରେ ଚଳିତ ବର୍ଷର ତୃତୀୟ ଛାତ୍ର ମୃତ୍ୟୁ ଘଟଣା ହୋଇଥିବାରୁ ଏହାକୁ ନେଇ ପୁଣି ଥରେ ଉତ୍ତେଜନା ପ୍ରକାଶ ପାଇଛି। ବାରମ୍ବାର ଛାତ୍ର ମୃତ୍ୟୁକୁ ନେଇ ବିଜେପି ବିଧାୟକ ସରୋଜ ପାଢ଼ୀ ଚିନ୍ତା ପ୍ରକାଶ କରିବା ସହ ଏଥିପାଇଁ ଦାୟୀ ଥିବା ବ୍ୟକ୍ତିଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମୁଖ୍ୟମନ୍ତ୍ରୀଙ୍କ ନିକଟରେ ଦାବି କରିଛନ୍ତି। ରାହୁଲ ଯାଦବଙ୍କ ମୃତ୍ୟୁ ଘଟଣାକୁ ମିଶାଇ କିଟ୍ କ୍ୟାମ୍ପସରେ ଏହା ହେଉଛି ଚଳିତ ବର୍ଷର ତୃତୀୟ ଛାତ୍ର ମୃତ୍ୟୁ। ପୂର୍ବରୁ ଘଟିଥିବା ଦୁଇଟି ଘଟଣା ନେଇ ବହୁତ ବିବାଦ ସୃଷ୍ଟି ହୋଇଥିଲା ।
ମୃତ ଛାତ୍ର ଜଣକ ହେଉଛନ୍ତି ରାହୁଲ ଯାଦବ (୧୮ ବର୍ଷ)। ସେ କିଟ୍ର କମ୍ପ୍ୟୁଟର ସାଇନ୍ସ ଇଞ୍ଜିନିୟରିଂ (BTech) ପ୍ରଥମ ବର୍ଷର ଛାତ୍ର ଥିଲେ। ତାଙ୍କ ଘର ଛତିଶଗଡ଼ର ରାଇଗଡ଼ରେ। ରୁମ ଭିତର ପଟୁ ବନ୍ଦ ଥିବା ତାଙ୍କ ହଷ୍ଟେଲ ରୁମ୍ (KP 7 AB, କ୍ୟାମ୍ପସ ୧୦) ଭିତରୁ ତାଙ୍କ ମୃତଦେହ ଉଦ୍ଧାର କରାଯାଇଥିଲା। ଇନଫୋସିଟି ପୋଲିସ୍ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ଅପମୃତ୍ୟୁ ମାମଲା (Unnatural Death Case) ରୁଜୁ କରି ତଦନ୍ତ ଆରମ୍ଭ କରିଛି। ତଦନ୍ତ ପାଇଁ ତାଙ୍କ ମୋବାଇଲ୍ ଫୋନ୍ ଓ ଲାପଟପ୍ ଜବତ କରାଯାଇଛି।
ପ୍ରାଥମିକ ତଦନ୍ତ ଏବଂ ମୃତ ଛାତ୍ରଙ୍କ ମା’ଙ୍କ ଅଭିଯୋଗ ଅନୁଯାୟୀ, ଏଥିରେ ପ୍ରେମ ସଂପର୍କ ରହିଛି । ଉକ୍ତ ଝିଅର ପରିବାର ପକ୍ଷରୁ ହଇରାଣ ଓ ଧମକ ଯୋଗୁଁ ରାହୁଲ ମାନସିକ ଚାପରେ ଥିଲେ। ତାଙ୍କ ମା’ ଅଭିଯୋଗ କରିଛନ୍ତି ଯେ ଝିଅର ପରିବାର ତାଙ୍କୁ ଓ ତାଙ୍କ ପୁଅକୁ ବାରମ୍ବାର ଧମକ ଦେଉଥିଲେ। ପୋଲିସ୍ ଏହି ଅଭିଯୋଗ ଆଧାରରେ ଝିଅର ବାପା, ମା’ ଏବଂ ଭାଇଙ୍କ ବିରୋଧରେ ମାମଲା ରୁଜୁ କରିଛି।
